Cun cuntierras polìticas, Europa, mùsica e archeologia, su movimentu linguìsticu sardu torrada a mòere dae pro sa segunda editzione de sa “Festa de sa Limba Ufitziale”. Su 26 e 27 cabudanni chi benint difatis su Coordinamentu pro su Sardu Ufitziale addòbiat totu sos chi ant aficu pro s’idioma isolanu pro una manifestatzione de ispàssiu identitàriu a favore de su bilinguismu e de sa rinàschida de sa limba natzionale sarda.
Sas datas non sunt ghetadas a fainu: su 26 de cabudanni est sa Die Internatzionale de sas Limbas de s’Unione Europea e s’assòtziu de sos militantes de sa limba ufitziale l’at seberadu pro assodire sos ativistas, pro si faeddare cara a cara, pro cuntierrare in bonas, pro detzìdere sas lìnias de interventu comunas, ma finas pro si ispassiare e bostu. Non b’at a àere petzi polìtica linguìstìca e istandardizatzione de su sardu in su menù, ma finas mùsica, archeologia, pràngios e chenas sotziales, artisanadu, videos, mostras linguìsticas e de libros e meda cosa in prus chi sos organizadores sunt ammaniende in custas dies.
Sas duas dies sunt programmadas in Òschiri in sa sede de sa Fundatzione Giovanna Sanna in pratza Monsignor Bua. Si comintzat sàbadu 26 a sas 16.00 cun s’isterrida de Roberto Carta chi at acontare de sos resultos de su traballu de su CSU in un’annu. A pustis duas relatas de Giuseppe Corronca (Sa limba ufitziale sarda Lsc) e Manuela Ennas (Mèdias e polìtica linguìstica in Sardigna).
A sas 18.00 est prèvedida una mesa de arresonu polìticu subra sa polìtica linguìstica in Sardigna a sa cale ant aderidu Joan Adell (rapresentante de su guvernu catalanu in Sardigna), Efisio Arbau (Sìndigu de Ollolai e leader de La Base), Bustianu Cumpostu (Sardigna Natzione), Roberto Deriu (PD), Giovanni Columbu (segretàriu natzionale Psd’Az), Mauro Pili (Unidos) e Christian Solinas (cussideri regionale Psd’az).
A sas 20.00 b’est su cuntzertu de sa cantante Carla Denule. A sa fine chena sotziale.
Domìniga mangianu su 27, a sas 9.30 assemble-dibàtitu de su Coordinamentu pro su Sardu Ufitziale, coordinada dae Paolo Mugoni e Sarvadore Serra, aberta a totus cun in programma una filera de interventos e testimonias de de intelletuales, maistros, operadores, iscritores, poetas, ativistas e tzitadinos comunes. A sa fine, iscritura e aprovatzione de unu documentu polìticu subra sa netzessidade de una ufitzializatzione e istabilizatzione de su sardu che a limba ufitziale de sa Regione Autònoma de Sardigna.
At a èssere finas presentadu unu documentu, pedidu dae su Cussìgiu de s’Europa, de denùntzia contra a s’Istadu Italianu pro sa discriminatzione de sa limba sarda. Su mese de triulas coladu, difatis, unu rapresentante de su CSU, su giai diretore de su servìtziu regionale Giuseppe Corongiu, aiat addòbiadu in Roma, sos “ispetores” de s’organismu europeu chi si incurat de deretos tziviles chi at mustradu aficu a defensare sa càusa sarda forsis finas cun unu amonestu dàbbile a s’Istadu pro more chi discrìminat sa limba sarda.
A pustis, pràngiu sotziale e bìsita archeològica ghiada in limba sarda (a incuru de Giorgio Pala) in s’importante situ archeològicu de s’altare de Santu Istèvene.
In s’ìnteri de sas duas dies at a èssere possìbile a bìdere un’espositzione de libros a incuru de s’agentzia Manca, sa mustra “Catalanu, limba de Europa” (a incuru de su guvernu catalanu), unos cantos videos in sardu de s’autore Gianni Langiu e unos cantos produtos de artisanadu.
Si podet corcare in paritzas istruturas de sa bidda e unu si podet finas marcare pro sos menù cunventzionados finas pro tzelìacos e veganos.
Sa punna de sa manifestazione, difatis, est cussa de promòvere e defensare su protzessu de istandardizatzione e afortigamentu de su sardu in tempos in sos cales prus de una fortza diat chèrrere iscontzare su traballu fatu in sos urtimos annos. In custos ùrtimos deghe annos, finas cun sa pressione de su Movimentu Linguìsticu, si sunt fatas cosas medas, ma paritzas abarrant de fàghere e in prus b’est finamenta s’arriscu de si mantenere firmos o, si est a la nàrrere a beru, de torrare in segus.
Tando est netzessariu unu momentu de addòbiu e de festa, sèria ma finas lèbia, pro acrarire, informare, denuntziare, cumbìnchere e apasigare subra su tema de sa limba ufitziale e de sos fatos, finas neulosos, chi l’indùrriant. Una Die, aberta a totus, in ue si podet cumprèndere finas in alligria ite est sa limba ufitziale, ite tretu at fatu e ite galu depet fàghere.
Sa LSC no est prus unu simple còdighe amministrativu in essida dae sa Regione. In custos annos est andada a in antis e est impreada a paritzos livellos dae paritzos entes e sugetos privados. Est intrada in s’editoria, in sa televisione, in sa literadura, in sas artes, in sas iscolas e finas in s’universidade. Proite si cheret firmare custa pesada?
Sa Giunta, su Cussìgiu regionale, sos rapresentantes de sos partidos e de sos movimentos polìticos, sos sìndigos, sos àteros entes e s’opinione pùblica non podent fàghere finta de nudda pro custa chistione imbeniente. Totus sunt cumbidados a partetzipare.
