Limba... Sarda!

Limba… Sarda!

A ora de sas 17.00 de oe su situ internet http://www.labarbagia.net/ at dadu a ischire una nova chi at a pònnere ispera manna a sos chi istamant sa limba sarda: su sòtziu culturale PARIS de Ollollai, cun s’agiudu de s’Agriturismu Palai, fintzas issu de Ollollai, ant a premiare sos pitzinnos chi ant a chèrrere fàghere sos esàmenes in limba sarda. S’idea est bènnida  a pustis de sas novas de custas dies chi faeddaiant de Riccardo Laconi e de Elisa Melis: su pitzinnu est su chi at fatu s’esàmene de 3^ mèdia in Casteddu in limba sarda, sa pitzinna est imbetzes s’istudiante talanesa chi no at pòdidu faeddare in sardu pro s’esàmene de su diploma de istòria sarda in Tortolì.

Su sòtziu PARIS at pensadu de premiare duncas sos pitzinnos chi ant chèrrere faeddare in sardu in sos esàmenes: su prèmiu at a èssere su de los istrangiare in s’agriturismu, paris cun su babbu e cun sa mama, in unu fine chida. Pro ischire prus informatziones si podet telefonare a sos numero 3333864516 o 3381582784 o iscrìere a: agriturismopalai@libero.it.