Sa Regione at nominadu su diretore nou de su Servìtziu Limba Sarda de s’assessoradu de s’istrutzione Pùblica. Si narat Maria Isabella Piga est naschida in su 1954 e est laureada in Matematica. Est unu dirigente regionale in fortzas finas a eris in su Servìtziu Ispetivu de sa Presidèntzia de sa Giunta Regionale, ma at traballadu pro tempus meda de sa vida sua in s’assessoradu a su Traballu.
Su decretu de nòmina l’at firmadu su presidente Pigliaru a cunsonu cun s’assessora Claudia Firino e s’assessore de su personale Giammario Demuro. Custa mangianu in su situ ufitziale de sa Regione est istadu publicadu su nòmene chi andat a prènere cussa casella de “vacante” lassada gasi dae Giuseppe Corongiu su 16 maju coladu.
Maria Isabella Piga, in sos annos de carriera regionale, at traballadu in diferentes masiones. At fatu s’espertu de istatìstica in s’osservatòriu de su traballu, su dirigente de staff in sa diretzione generale de s’assessoradu de su traballu, presidente de sos nucleos de valutatzione de sos bandos Por e finas in sas commissiones de valutatzione de sos dipendentes. At fatu s’animadora pro sas oportunidades parìviles e su diretore de su servìtziu pro su coordinamentu territoriale de sas sedes perìfericas de sos Tzentros Regionales de Formatzione Professionale de argunas provìntzias.
In su curriculum suo ponet chi connoschet su frantzesu a livellu iscolàsticu, ma non declarat sa connoschèntzia de su sardu o de àteras limbas de Sardigna.
Leave a comment
Semos postos bene.Ite crediabamos de ottennere dae unu gubernu regionale chi fintzas a como non at dimostrau interessu pro sa cuestione de sa limba nostra? Cale cumpetentzias at custa pessone pro esser posta a ghiare s’uffitziu de sa limba sarda?