Sa Juventus, s’Inter e sa Roma sunt chirchende su giogadore de fùbalu belga chi est de su Casteddu.
Sos chi prus punnant de lu comporare paret chi siant sos de sa Roma.
Su presidente de su Casteddu, non b’arresonat nemmancu pro prus pagu de 15 milliones de Euro, est custa duncas sa làcana de nche brincare e chi custas iscuadras mannas tocat chi rugrent pro pòdere leare su giogadore.
Su diretore isportivu de sa Roma, Sabatini est su prus chi at mustradu sa boluntade de chèrrere a Nainggolan, ma sa dificultade chi sa Roma como est afrontende est a no àere galu seberadu s’allenadore pro s’istajone 2013-2014, e duncas no ant galu dispostu sas àndalas tècnicas e de giogu de s’iscuadra de sa Capitale.
Su negòssiu podet sighire mègius semper e cando sa Roma at a bèndere a De Rossi a s’iscuadra inglesa de su Chelsea.
S’Inter imbetzes punnat a lu comporare, siat pro su balore suo, siat pro chi s’iscuadra, mescamente in mesu campu, siat prus giòvana, e Mazzarri, chi lu cheriat finas sende in su Nàpoli, l’at pedidu a Branca e a Ausilio.
Pro sa Juventus Nainggolan diat pòdere èssere de importu, s’esseret chi unu intre Marchisio e Vidal andet a su Real Madrid, in mesu de su negòssiu de Gonzalo “el pipita” Higuain, chi est semper prus a curtzu a pònnere sa màllia de s’iscuadra torinesa.
