Limba sarda e benidore, si non cumbenit sa gherra est pèrdida.

limbasarda

A ite serbit in su 2013 sa limba sarda? Sa beridade est una ebbia, sa limba sarda in su tempus de oe non serbit a nudda, finas si a nos pensare unu mundu ue sa limba sarda no esistit prus no est chi siat una de sas mègius cosas.

Ma comente si siat, totu cussos babbos e cussas mamas chi ant fatu a manera de nche istritzire sa limba sarda dae su coro de sos fìgios, l’ant fatu pro bonu, l’ant fatu ca in idea issoro fiat a megiorare su benidore de sos fìgios.

Tempus chi como est mudende: como est su tempus de sos sèberos.

Amus cumpresu chi sa limba sarda nche l’ant istritzida sos sardos matessi ca fiant cumbintos chi pro sos fìgios non fiat de importu, ca in paràulas cruas non bi bogaiant profetu perunu dae su de ischire su sardu.

E duncas? Como tocat de seberare e sos caminos sunt duos:

  1. de sa limba sarda no nde l’afutit nudda a nemos e la lassamus andare de gasi che a sa barca de carruba..
  2. de sa limba sarda nos nd’afutit e devimus fàghere cale si siat cosa pro la sarvare.

E si comente inoghe semus arresonende de crèschida de sa Sardigna su pensamentu meu  est chi chene limba sarda non b’at crèschida in Sardigna, su tempus chi semus bivende como est sa mustra chi meda de sa polìtica de cada ala chi est istada acumprida no est istada de profetu pro sa Sardigna, e forsis no lu est istada ca est istada pensada cun ogros chi non sunt de sos sardos, est istada iscrita cun paràulas chi non sunt sardas e tando comente faghimus a nos ispantare si no at funtzionadu?

Tocat de abbaidare cun ogros sardos, e cun sa visione de sa polìtica chi punnet a sa Sardigna.

Sa paràula chi cada ala polìtica bogat a capu in ogni votatzione est  AUTONOMIA, ma chene sa limba non podet esìstere s’autonomia, s’unica punna sua est a faddire. A pèrdere.

 

E si cherimus custu sa polìtica devet fàghere petzi una cosa: amus naradu in antis chi una de sas cajones de sa debilesa de sa limba sarda est sa pagu cumbènia chi issa produit.

E tando b’at petzi una cosa de fàghere: s’intendet meda inoghe chistionende de SUPER LEGES…

bene, una super lege a pitzu de sa LIMBA SARDA, e su printzìpiu chi devet ispirare custa lege devet èssere unu ebbia. LIMBA SARDA  = CUMBENIA:

in cada àmbitu de sa sotziedade.

Apo a fàghere paju de esèmpios ma bi nde diat àere 1000

 

  1. Pro intrare a sos postos de traballu pùblicos in Sardigna tocat de ischire faeddare e iscrìere in Sardu.
  2. Sas iscolas chi faghent su sardu curriculare mantenent sa presidèntzia e sas classes finas cun su chimbanta pro chentu in mancu de su mìnimu chi bi cheret pro sas iscolas chi non faghent sardu curriculare.
  3. Sas atividades chi proponent cartellonìstica, menu, etichetas etc finas in sardu ant cumbènias fiscales de importu. (tassas minimadas de su 50 pro chentu)
  4. sos mèdios de comunicatzione chi proponent su  pro chentu de programmatzione o de artìculos in sardu ant cumbènias fiscales de importu (tassas minimadas de su 50 pro chentu).
  5. Sos entes locales chi non faghent sos atos bilìngue andant in penalidade in bandos e finantziamentos: chie imbetze faghet sos atos bilìngue at a àere premialidades in bandos e finatziamentos.

 

Custos sunt pagos esèmpios de comente sa classe polìtica diat pòdere, cherende fàghere fronte a sa chistione de sa limba sarda.

Est craru chi pro fàghere totu custu bi cheret una muda a s’istatudu, ma custu est su sentidu prus profundu de s’autonomia, chi tocat de torrare a leare.

Cheria serrare s’arresonu meu cun unu cunsideru a pitzu de sas iscolas de s’infàntzia, ca, in sos logos ue galu si mantenet sa trasmissione intergeneratzionale est su primu logu ue sa limba si nche istritzit.

Diat èssere fundamentale a obligare totus sas iscolas maternas sardas a fàghere su  50 pro chentu de letziones in sardu, pro chi si mantèngiat dae minore e e si creet sa cussèntzia de su bilinguismu.

Si sa polìtica cheret, custu est su còmpitu suo. Si sa polìtica non cheret non si cuet in palas de chistiones farsas, ma lu nàrgiat a craru: de sa limba sarda non nos nd’importat nudda.

E si leet custa responsabilidade in cara de totus sos sardos.