"Limba e libros in su Museu Sanna", giòbia 20 de martzu

1_240_20120705162029

Comunicadu pro s’imprenta

Limba e libros in su Museu Sanna

Su Servìtziu Limba Sarda de s’Assessoradu a s’Istrutzione Pùblica de sa Regione Autònoma de Sardigna cun s’Isportellu Linguìsticu Regionale pro sa limba sarda e catalana, organizat in Tàtari tres addòbios chi, gràtzias a sa collaboratzione cun su Ministèriu pro sos benes e sas atividades culturales, s’ant a fàghere in su Museu Natzionale “A. Sanna” de Tàtari.

Limba e Libros in su Museu Sanna” est su tìtulu de sa manifestatzione  chi previdet diferentes apuntamentos pro valorizare sa limba sarda e sas variedades alloglotas de sa Sardigna chi si còllocant in una rete importante  de initziativas chi su Servìtziu promovet dae medas annos.

Su primu apuntamentu est giòbia 20 de martzu in sa sala de sas cunferèntzias de su Museu Natzionale “A. Sanna” in carrera de Roma n.64 a sas 17,30 cun sa presentada de s’ùrtimu libru de Pàulu Pisu “Gli ultimi pastori sardi? Storie, testimonianze, prospettive”, editziones Cuec.

A pustis de sos saludos  de Gabriella Gasperetti, diretora de su Museu, at a moderare su dibàtidu Juvanna Tuffu de s’Ufìtziu regionale de sa limba sarda.

Sunt prevìdidos sos interventos de s’iscritore Pàulu Pillonca e de Batista Cualbu, Presidente regionale de sa Coldiretti. A sa manifestatzione at a èssere presente s’autore de su libru Pàulu Pisu. Durante s’initziativa at a dare sa testimonia sua carchi pastore de su territòriu e s’at a esibire su coro a tenore “Su cunsonu tiesinu”. Su libru regollet medas intervistas a pastores e a massajos de Làconi e analizat unu de sos aspetos culturalmente e economicamente prus problemàticos de s’ìsula.

Sa crisi generalizada, e cussa de sa campagna in particulare, imponet una riflessione chi est in su matessi tempus polìtica, sotziale e morale. S’autore, sìndigu de Làconi, est istadu unu de sos fundadores de su “Comitadu pro sa limba e sa cultura de sos sardos” e promovidore de sa “Marcia sarda per la pace”. Sas àteras publicatziones suas sunt: Partito Comunista di Sardegna. Storia di un sogno interrotto (1996) e Figli della Società. Carcere, devianza e conflitto sociale (2008).

Sos apuntamentos imbenientes de sa manifestatzione “Limba e libros in su Museu Sanna”: giòbia 27 de martzu a sas 17.30 “Les mies mans” libru de poesias de Antoni Canu, editziones Nemapress e giòbia 3 de abrile a sas 17.30 “Istòria de unu cau Marinu” tradutzione in sardu de su libru de Luis Sepulveda “Storia di una gabbianella e del gatto che le insegnò a volare”, editziones Papiros.