Limba: Corongiu faeddat in sardu in su Tg de Videolina

Videolina, sa televisione prus manna de Sardigna, at mandadu oe in unda in su tg un’intervista a su lider de s’ufìtziu de sa limba in sa Regione Giuseppe Corongiu chi at faeddadu petzi in sardu respondende a sas pregontas, in italianu, de su giornalista. S’emitente at finas, in s’editzione de su mangianu, postu in sos tìtulos de intrada de su telegiornale sa nova de su cursu de formazione FILS.

Si no est sa prima bia chi custu càpitat, de seguru est de importu chi sa televisione prus sighida de s’ìsula apat a calincuna manera “isdoganadu” sa limba sarda. Finas carchi annu como, difatis, fiat impossibile de pòdere pessare de impreare su sardu in una parte de trasmissione gasi importante. Su sardu fiat abbandadu o in sos programas “pagados” dae sa Regione o in sos ispetàculos de teatru tradizionale in limba. Su chi si isperat est chi custu siat unu sinnale bonu de sa disponibilidade de sos canales televisivos cunforma a sa limba.

S’intervista fiat fata in ocasione de su cunvegnu de formatzione FILS, organizadu dae Regione, Universidade e Ministeru pro inaugurare su cursu pro una chentina de dotzentes de e in limba sarda. In sa die de oe fiant in programa 5 letziones in sardu de acadèmicos casteddajos. Pro sa Regione, e pro Corongiu, sa formatzione depet èssere ispirada a sa veicularidade linguistica (CLIL in sardu) e s’imparu de su sardu fatu subra argumentos de interessu cuntemporàneu.

Sa cumbata cun s’Universidade de Tàtari de s’istade colada at ammustradu chi sos poderes antilimba, cuados e nono, non sunt de acordu.