Istadu italianu: elìgidos sos Presidentes de sas Cameras

Su Parlamentu
Su Parlamentu

Unu signale de mudamentu: est su chi paret s’eletzione de sos Presidentes de sas Càmeras de s’Istadu italianu. Unu signale piticu a mustrare de àere seberadu duos polìticos noos, non duos “matusalemmes” de sa polìtica italiana. Fintzas a s’àtera difatis pariat chi deviant èssere elìgidas duas caras nòdidas de su tzentru-manca Anna Finocchiaro e Dario Franceschini, cun Renato Schifani, de sa destra, chi isetaiat sos votos de sos parlamentares de Monti pro torraret a èssere elìgidu.
E imbetzes sas Càmeras, su 16 de martzu, ant seberadu Pietro Grasso e Laura Boldrini, su primu de su PD e sa de duos de SEL. Ambos a sa prima esperièntzia in Parlamentu, ant fatu bida e traballos diferentes: Grasso est istadu magistradu, Procuradore de Palermo e dae su 2005 Procuradore Natzionale Antimàfia, Boldrini imbetzes at impignadu sa bida sua in defensa de sos disterrados, comintzende custa atividade cun s’ONU e a pustis cun sa FAO e pro su programma PAM (Programma Alimentare Mondiale).
A ora de sa 13.00 est arribadu su resurtu de sa votatzione de sa Càmera de sos Deputados, cun Laura Boldrini elìgida cun 327 votos in favore. At chèrfidu ammentare chi sas emergèntzias de s’Istadu italianu pertocant sos deretos, su traballu e sas fèminas. At sighidu narende “S’Àula de sos deputados at a ascurtare sa suferèntzia sotziale de una generatzione” ammentende sos giòvanos meda chi ant dèvidu lassare s’Itàlia pro chircare traballu in àteros Istados istràngios.
A ora de sas 19.00 imbetzes est arribada s’eletzione de Grasso a Presidente de sa Càmera de sos Senatores, cun 137 votos (12 in prus de sos senatores de su tzentru-manca). In s’arrèsonu suo, sas frases de importu prus mannu sunt istadas “Apo a èssere su Presidente de totus”, “Sas Càmeras siant una domo de bidru”, “S’Itàlia cheret rispostas.”