Unu signu fortzis minore ma de importu mannu pro totu su movimentu linguìsticu. Est su chi at chèrfidu dare Frantziscu Pàulu Cannas chi, elìgidu pro sa de duas bortas sìndigu de Collinas (bidda connota unu tempus che a “Forru”), at giuradu fidelidade a sa Carta Costitutzionale in antis in limba sarda e a pustis in limba italiana.
In custos ùrtimos annos sa Comuna de Collinas s’est mustrada atentzionada meda a sa limba sarda: pro mèdiu de sa biblioteca e de s’Ufìtziu de sa Limba Sarda sunt istados ammaniados paritzos cursos, atividades e laboratòrios de sardu.
Est de nàrrere fintzas chi custa Comuna est nòdida pro una Rapresentatzione Istòrica de s’Iscravamentu de Cristos fata totu in limba sarda e chi est parte de su progetu “Sa Chida Santa” ordimingiadu dae sa Regione Sardigna.
Custu giuramentu in sardu non pàrgiat de pagu contu, mescamente ca tocat de ammentare su chi b’aiat capitadu in su 1980 cando su sìndigu de Bauladu, Italu Ortu, fiat istadu indagadu ca a pustis de àere giuradu in italianu aiat giuradu fintzas in sardu. A fàghere sa denùntzia, a Ortu, a Gianni Atzori e Salvatore Bonesu chi aiant fatu de testimòngios, fiat istadu Pietro De Luca chi su tempus fiat su prefetu de Aristanis. Su protzedimentu giuditziàriu fiat istadu a pustis archiviadu, ma custa faina est restada in s’istòria che a unu de sos peus momentos pro sa libertade d’espressione de sos sardos.
Como, mancari chi sa lege 482/99 nos permitat de pòdere giurare fintzas in sardu, sos sìndigos si nde “ismentigant” de lu fàghere. E tando s’augùriu est chi s’atzione de Cannas siat una ghia pro totu sos sìndigos sardos, in ammentu fintzas de s’istòria de 33 annos a como e in onore a sa libertade de lu pòdere fàghere.