Carchi die a oe Fortza Paris, pro mèdiu de Gianfranco Scalas, at fatu unu comunicadu de imprenta chi no at àpidu visibilidade in sos mèdias de comunicatzione che a sos giornales e sas televisiones, ma chi est girende meda in internet.
Su comunicadu est de importu mannu ca cheret ammentare a sos deputados sardos, de totu sos partidos, eligidos in sas ùrtimas votatziones chi una punna issoro devet èssere su de fàghere reconnòschere in Parlamentu sos deretos de minoria linguìstica de sa Sardigna e de sos Sardos.
Su reconnoschimentu diat cumportare efetos positivos comente càpitat giai in regiones che a sa Badde de Aosta e a su Trentinu: in su comunicadu si faghet s’assempru de s’indennidade de bilinguismu chi pro sos dipendentes pùblicos cheret nàrrere fintzas a 180 euros in prus in s’istipèndiu. In prus diat cumportare sa possibilidade pro sos sardos de leare parte a sas votatziones sena cròmpere a su 4% a livellu natzionale e duncas diat cumportare sa possibilidade pro sas fortzas identitàrias de sa Sardigna de leare parte a sa bida democràtica italiana cun sa matessi dignidade sena penalizare deretu perunu.