Firino 'botzada' pro su sardu, ma chentu miliones andant a is ateneos.

Firino 'botzada' pro su sardu, ma chentu miliones andant a is ateneos.

Redatzione

IMG_0453

Pro s’Unione Sarda de s’àtera die, s’assessora Firino est insufitziente in limba sarda. In su mentres però sa Regione ponet àteros chentu miliones de èuros pro su Campus universitàriu de Casteddu. A un’ala, pro sa limba e cultura sarda, totu blocadu. A s’àtera, pro sas universidades, paret chi sa Regione agatet semper sa manera de bogare sa ‘pilla’.

Sa dificultade de Claudia Firino, assessora regionale de sa cultura, est essida a campu finas in is ‘pagellas’ pro sas primas chentu dies de guvernu aprontadas dae su cuotidianu de Casteddu. In ie ant iscritu chi s’assessora, a dolu mannu, non lompiat sa sufitzèntzia pro custu primu tretu de guvernu chi at fatu finas a como.

<Antis s’ausèntzia ‘istitutzionale’ de sa Sardigna a sa Fiera de su libru – iscriet su giornale de Casteddu – posca s’ismenguamentu de su servìtziu limba sarda cun sa giagarada de su diretore e su frimmu a totu sas atividades. S’idea est chi s’assessora, finas a como, apat dèpidu bajulare sa ‘collegialidade’ de sa giunta ( pro impreare un ‘eufemismu e non faeddare de ‘commissariamentu’ dae banda de calicuna fatzione o lobby polìtica) e non siat renèssida a impònnere sa mirada sua. Forsis cumbenit a comintzare a si fàghere intèndere, nessi cun sa fortza de sas ideas. Sende chi, finas a como – serrat L’Unione – non s’est cumpresa s’idea sua de cultura>.

Giudìtziu crispu, finas tropu chi però est su matessi chi s’est intesu in s’assemblea de su
Coordinamentu Sardu Ufitziale de Santa Justa . Firino a s ‘in capas, no at un ‘idea mala de su bilinguismu, ma l’ant istraviada dae sa beridade e dae sa sabidoria. Pro interessos ideològicos o personales. Su chi paret, dae fora, est chi s’assessora no apat cussigeris e cussigeras bonas, ma personàgios chi la faghent faddire meda. Finas a unu puntu chi non si podet torrare in segus dae sos dannos.

E gasi sos finantziamentos de sa limba sarda sunt blocados, mentres sa Giunta sighit a gastare bundante pro sas universidades .

S ‘ùrtima est de chida colada: chentu miliones pro su Campus Universitàriu de Casteddu annùntziados dae su presidente Pigliaru. E su Patu de Istabilidade? Pro sos ateneos non balet o non pertocat. Chissài chi Claudia Firino cumprendat e lasset a pèrdere pressiones esternas e continuidades tècnicas cun s’era Cappellacci o ante LSC. Antis chi siat tardu.

Curiosu però: chentu dies pro chentu miliones. Unu cada gerronada de guvernu. Finas a como. Ma unu votu galu insufitziente.

Leave a comment

1 Comment

  1. Dispraghet chi s’assessora tenzat in contu prus sa oghe, e amenetzos de sos santones universitarios, de sa oghe de su populu suu chi atera cosa no pregontat che su foeddae in totue la limba sua. S’ispera est chi arreconnoscat sa faddonca manna chi at fatu e torret in pannos suos in s’indipendentzia de su votu chi dd’ant permittiu de setzede in cadrega. DDi cherio fenamentas faede unu pregontu, chi est:” Puite at permittiu chi su sambenau suu, chi est Firinu che-i su meu si dd’ant italianizzau?”. Parent cosa de nudda ma asì no est.

Send a Comment

S'indiritzu email tuo no at a èssere publicadu. Is campos pedidos sunt signados *