Finantziària 2015: dae sa Giunta nudda dinare a limba e Die

Finantziària 2015: dae sa Giunta nudda dinare a limba e Die

de Coordinamentu Sardu Ufitziale –

CSU

Comunicadu imprenta

Finantziària 2015: sa limba sarda e sa Die pro sa Regione non esistint prus

 

Sa polìtica in favore de sa limba sarda est bènnida a mancare in sa proposta de finantziària 2015 chi sa Giunta Regionale at imbiadu a su Cussìgiu pro s’aprovatzione. Su  Coordinamentu pro su Sardu Ufitziale, finas si no est abarradu ispantadu dae custa faina, denùntziat custu datu e pedit de istare atentzionados a custa òpera de distrutzione de s’identidade giuta a dae in antis dae su guvernu regionale in manu a sos professores.

 

In su documentu de sa Giunta si sarvant isceti sas ispesas obligadas: sas previsiones de dinare dae s’Istadu pro sa lege 482/99 e su funtzionamentu de s’Ufìtziu linguìsticu regionale pro un’annu.   Partidas de carchi chentina de mitzas de èuros chi non si podent burrare pro òbligu contàbile.  Pro su chi abarrat, imbetze, su traballu de sos ùrtimos deghe annos est istadu brusiadu: trasmissiones tv, radio e web in cumpangia de rivistas telemàticas e in pabiru. Su insingiare sa limba in s’iscola in oràriu curriculare, sa formatzione de sos professores o de sos operadores linguìsticos. Sas integratziones a sos isportellos pro sa promotzione linguìstica cun sa pèrdida de paritzos postos de traballu.

 

Si firmant pro fortza finas su Curretore Ortogràficu Regionale, giustu eris bantu de s’Amministratzione, e s’Atlante Linguìsticu de sas variantes, òpera manna in custos annos giuta a dae in antis dae su famadu diretore de s’Atlante Linguìsticu Internatzionale Romanzu Michele Contini. Arriscat finamentas su progetu  “Bilinguismu Creschet”, contivigiadu paris cun s’Universidade de Edimburgo. Sa matessi sorte tocat a sas collaboratziones cun s’Universidade de Madrid, su Friuli, sa Badde de Aosta e su Trentinu. Faeddamus de sos puntos printzipales de unu progetu pensadu in mannu e cun sa punna de bogare a pitzu su prestìgiu de sa limba sarda finas a livellu internatzionale, progetu chi como benit torradu a nudda in pagu tempus dae su guvernu regionale.

 

 

S’ant a dèvere firmare fintzas sos traballos pro sas òperas didàticas de su sardu e sas tradutziones in sardu de sos testos nòdidos de sa literadura otzidentale e totu sas atividades de promotzione informàtica o de materiale bonu a fàghere a connòschere custos temas a sas famìllias interessadas a su bilinguismu. Nemmancu un’èuru pro sas Universidade chi però resessent a buscare aterue sa bellesa de 22 milliones de èuros.

 

Pro cumprire cun su bessu de custu solovru de su patrimòniu identitàriu de s’Ìsula, comunicamus chi sunt torrados a zero finas sos istantziamentos pro tzelebrare Sa Die de sa Sardigna 2015, die natzionale de s’identidade de su pòpulu sardu. Su Coordinamentu pro su Sardu Ufitziale ammentat dae como chi, s’in casu sa Regione no at a fàghere nudda, s’at a impignare, cun àteros assòtzios e grupos, a organizare àteras tzelebratziones gasi comente est istadu fatu pro sa Cunferèntzia Natzionale de sa Limba Sarda in su mese de Nadale 2014.

 

Custu cuadru gasi male pintadu chi ponimus in contu a su 2015 s’agiunghet a su malu andamentu de s’assessoradu regionale chi paret firmu meda e finas giutu a fàghere nàschere cunditziones bonas a catzare, o pònnere a cumone cun àteros setores, su Servìtziu Limba Sarda. Su pianu triennale linguìsticu est iscadidu dae prus de un’annu e niunu nos narat cales sunt sas ideas pro lu  mantènnere in pee. S’Osservatòriu Regionale, pro cantu non giuet a nudda, non est istadu mai cunvocadu. Sa Regione non at promòvidu prus s’iscritura de atos in limba ufitziale nen sos chi guvernant ant prus faeddadu in sardu in pùblicu. Non si cumprendet bene cale est sa positzione in contu de sa promotzione de s’istandard iscritu Limba Sarda Comuna, in su mentres chi si faghet logu a chie cheret dialetizare s’arresonu de sa limba pro more de àteras propostas de istandard locales, a curtzu a visones de campanile e personales. Lègiu meda, a pàrrere de su Coordinamentu, su tratamentu riservadu a sos isportellos linguìsticos chi, mancari sas promissas fatas dae su guvernu regionale, sunt istados abbandonados a bonu issoro.

 

Lòmpidos a inoghe parent chena contu e chena cabu initziativas cales sa motzione pro pedire a su Parlamentu s’aprovatzione, a tutela de su sardu, de sa Carta Europea de sas limbas o sas propostas de lege chi faeddant de insingiare su sardu in iscola o de l’àere presente in sos media a sos cales però si bogat su dinare pro bi pòdere traballare.

 

Su Coordinamentu  pro su Sardu Ufitziale pedit imbetze a su Cussìgiu Regionale un’interventu detzisu pro torrare echilìbriu a sos capìtulos de bilantzu de sa promotzione linguìstica e de sa tzelebratzione de sa Die de su pòpulu sardu.

 

Coordinamentu Sardu Ufitziale

 

Sardigna, 31 ghennàrgiu 2015

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *