Festa de Bonàrcadu: prima presentada de Sintesa, su sintetizadore vocale de su sardu

Festa de Bonàrcadu: prima presentada de Sintesa, su sintetizadore vocale de su sardu

locandina1bonarcadoSi narat “Caràteres e istruturas fonèticas, fonològicas e prosòdicas de sa limba sarda” unu progetu de chirca de base de s’Universidade de Casteddu pro realizare unu sintetizadore vocale TTS (Text To Speech, est a nàrrere ‘dae su testu a s’allega’). Lu presentant in sa de tres editziones de sa Festa de su sardu ufitziale in Bonàrcadu. Su protòtipu si narat “SINTESA” (sintetizadore de sa limba sarda). Cheret nàrrere chi, pro sa prima bia, un’elaboradore podet faeddare in sardu moende dae s’iscritura. L’ant a presentare sos autore in sa sala de su tzentru polivalente su Lare in sàbadu, in sa manifestatzione chi comintzat a sas 4 de merie. Francesco Cheratzu, Maurizio Virdis e Riccardo Mura nos ant a acrarire custa bella faina.

Su progetu Sintesa s’est isvilupadu dae su 2013 a su 2015. Ponet in pare disciplinas linguìsticas e informàticas diferentes. Est cuidadu dae s’editore Condaghes At impinnadu unas deghe pessones. Gràtzias a custas pessones, su sardu est intradu in sa famìlia minore de sos idiomas tecnologizados.

Si abbaidamus sos nùmeros, infatis, sas limbas classificadas in su mundu sunt prus de sete mìgia; b’at petzi unas baranta limbas suportadas cun sintetizadores in sos telèfonos intelligentes; si leamus in cussideru sos sintetizadores isperimentales, nche crompimus petzi a 55 limbas.

S'editore Frantziscu Cheratzu
S’editore Frantziscu Cheratzu

Pro fàghere custu e àteros progetos che a Sintesa, est craru, bi cheret una forma iscrita de riferimentu. Sena istandard, una limba in su setore informàticu non si podet impitare. Pro bonaura, custu istandard lu tenimus: est sa limba sarda comuna, adotada cun deliberatzione de sa Giunta regionale n. 16/14 de su 18.4.2006, chi tenet comente ogetu s’ “Adotzione de sas normas de riferimentu a caràtere isperimentale pro sa limba iscrita in essida de s’Amministratzione regionale.”. In custos deghe annos si podet nàrrere chi s’esperimentu est andadu bene: antzis, sa lsc nch’at brincadu sas làcanas de s’impreu amministrativu pro si fàghere limba literària (bastat a pessare, pro nàrrere, a sa sèrie SenaLàcanas, cuidada da sas sotziedades editoriales “Papiros” e “Condaghes” chi ant publicadu, cadauna cun libros suos, òperas de sa literadura internatzionale bortadas in sardu) e limba de sa comunicatzione informàtica (pessemus, pro nàrrere, a sitos comente https://salimbasarda.net/ ).

A custu s’agiunghet su fatu chi sa lsc tenet unu curretore ortogràficu: est su CROS, disponìbile in su situ de sa RAS, http://www.sardegnacultura.it) chi si podet impreare cun elaboradores de testos che a OpenOffice e LibreOffice. Est partu duncas naturale a impitare sa lsc in custa faina.

Tando, ite b’at de nàrrere in prus? A in antis cun sa limba sarda tecnològica!

Ligàmenes:

https://salimbasarda.net/politica-linguistica/bonarcadu-su-programma-de-sa-festa-de-su-sardu-ufitziale/

https://salimbasarda.net/politica-linguistica/sintesa-unu-sintetizadore-vocale-pro-su-sardu/
http://sintesa.eu/
https://en.wikipedia.org/wiki/Comparison_of_speech_synthesizers

(redatz)

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *