S’Archìviu de Istadu de Nùgoro aberit sas ghennas a sa limba sarda.
Da custu mese e finas a nadale, in s’Archìviu de Istadu de Nùgoro est istadu ativadu s’isportellu linguìsticu, finantziadu dae sa lege 482/99 “Normas in matèria de tutela de sas minorias linguìsticas istòricas”.
Ùnicu in Sardigna, s’Isportellu at a traballare pro promòvere e valorizare s’impreu de sa limba sarda, interessende istitutziones e iscolas in atividades chi punnant a iscòbèrrere sos documentos de importu mannu chistidos in s’Archìviu de su cabu de logu barbaritzinu, e peri cun sa retza de sos Servìtzios Linguìsticos presentes in su territòriu regionale, a manera de sighire s’andala de una polìtica linguìstica cumpartzida.
Sas atividades de s’Isportellu de s’Archìviu de Istadu ant a incumentzare mèrcuris, su 13 de Martzu a sas chimbe de borta de die cun “Fèminas in Coro”; in ocasione de sas manifestatziones de s’oto de martzu. s’at a presentare su libru Coro, de Edmondo De Amicis, bortadu in sardu dae Mariantonietta Piga. Ant a intervènnere sa tradutora matessi e sa diretora de s’Archìviu dut.ssa Angela Orani e s’ant a lèghere branos de su libru in sardu chi faeddant de sos pessonàgios feminiles.