Cumentzat sa campagna pro promòvere s’impreu sotziale de su catalanu de S’Alighera.
Est una faina a incuru de sa Comuna, paris cun sa Generalitat de Catalunya- Espai Lull de de l’Alguer, e contivigiada dae s’agentzia Mouse Arti Grafiche.
Sa punna est a fàghere a manera chi si torret sa limba de S’Alighera in sa sotziedade, ca comente narat su nùmene de sa Campagna, in aligheresu si bi godit de prus, totu su micromundu de sa bidda de sa Nurra, miradu cun sa lente de sa limba sua, est diferente: est mègius.
Custa faina l’ant presentada su Sìndigu Istèvene Lubrano, s’Assessore de sas polìticas linguìsticas Romina Caula, su rapresentante de sa Generalitat de Catalunya Joan-Elies Adell in presèntzia de unos cantos rapresentantes de sòtzios culturales: Omnium Cultural, Obra Cultural e Associació per la Salvaguarda del Patrimoni Històrico cultural de l’Alguer, Istèvene Campus, Pino Tilocca e Guido Sari.
Sos temas chi pertocant custa campagna sunt meda: dae sa famìllia a su logu, sighende cun sa gastronomia finas a lòmpere a turismu culturale isport ecc.
Lubrano, acrarende cantu est de importu sa limba de su logu at ammentadu chi: “Sa limba aligheresa est una sienda pro nois, a la faeddare nos permitet de la mantènnere e de l’imparare a fìgios nostros: in prus pro nois est unu signale de apartenèntzia”e galu “in su programma de polìtica linguìstica nostru custu est unu momentu fundamentale, chi sighit sa firma de su protocollu de intesa dempridu cun su Guvernu Catalanu su mese de santandria coladu”
“Custa Campagna” at sighidu s’assessore Caula “intrat in sos isetos de dare balore a s’identidade chi s’amministratzione nostra s”at postu. Sa idea nostra est chi faeddende s’aligheresu totu su chi si faghet est mègius, prus beru, prus a curtzu a su logu nostru. Torrare a faeddare cada die sa limba nostra tocat chi siet una manera interessante pro mustrare a nois, e a sos chi benint a nos bisitare sa bidda nostra, ca En alguerés, té més gust”
Sos concruos los at fatos Joan Adell, de sa Generalitat, chi at ammentadu sa modernidade de custa Campagna e at ispricadu chi pro traballare pro s’aligheresu tocat a lu rèndere presente in cada logu, comente faghet custa campagna etotu in àmbitos diferentes, cun colores annoados,chi pintent sa bida de cada die e cun sa modernidade.
de Jorgi Rusta