Don Chisciote in LSC finas in sa Biblioteca de Catalunya

Don Chisciote in LSC finas in sa Biblioteca de Catalunya
Sala cervantina de sa Biblioteca de Catalunya
Sala cervantina de sa Biblioteca de Catalunya

Totu macos pro Don Chisciote in sardu in sa Penìsula Ibèrica. Pustis sa renèssida manna de sa donatzione a El Toboso, una delegatzione de s’Assòtziu  Sardos de Bartzellona at intregadu sa versione in sardu de su Don Quijote in manos de Núria Altarriba, diretora de sa Unitat Bibliogràfica de sa Biblioteca de Catalunya. Est de badas a nàrrere de su profetu pro custa idea.

Su libru at a intrare a fàghere parte de sa Sala Cervantina de sa Biblioteca chi como regollet prus de 50 tradutziones de su cabu de òpera de Miguel de Cervantes. Est un’initziativa, chi sighit a àteras de sa promotzione de su libru traduidu dae Gianni Muroni, chi ant chertu sos dirigentes de s’assòtziu isolanu de sa capitale catalana, intro de totus Claudia Loi (sa presidenta) e Alessandro Camboni, chi unos cantos annos a como si fiat distintu pro unas cantas publicatziones in sardu de creze iscientìfica.

Su libru est istadu agradessidu meda dae sas autoridades culturales catalanas chi si sunt impitzadas a valorizare s’òpera in limba sarda sende chi sunt galu fortes sos ligàmenes istòricos intro sos duos pòpulos e sa sensibilidade manna chi in su Printzipadu b’at pro totu sas limbas de minorias europeas e mondiales. Intro de medas limbas, a su sardu, sos catalanos reconnoschent un’importu mannu e nde apògiant su protzessu de istandardizatzione cun sa LSC, sena sa cale non bi podet àere polìtica linguìstica verdadera. Su sardu ufitziale est prus reconnotu in ie chi non in domo sua.

Sala Cervantina de sa Biblioteca Catalana
Sala Cervantina de sa Biblioteca Catalana

S’Assòtziu, chi est fatu mescamente de gente giovana, dae cando su presidente istòricu Raffaele Melis aiat favoridu su rinnovamentu unos cantos annos como, est ponendesi a craru pro sa calidade culturale de sos eventos chi proponet. Paris cun sos Sardos de Madrid, ghiados dae Gianni Garbati, at partzetzipadu de protagonista finas a su progetu de valorizatzione de su testu in sardu chi contat sas peleas de su Cavelleri de sa Trista Figura, chi at bidu s’intrega de su libru a su museu mantzegu de El Toboso e a su sèberu de su sardu intro sas limbas de su “Quijote poliglota”, volume chi tzèlebrat sos 400 annos dae sa morte de Cervantes.

Intro de custa faina, unu mese como, s’Assòtziu aiat presentadu su libru in Bartzellona cun sa presèntzia de sos giornalistas Pepe Coròngiu e Giagu Serreli e s’atzione teatrale-musicale de Elio Turno Arthemalle e Frantziscu Medda Arrogalla. Como, cun sa bella idea de cunsignare s’òpera finas a sa Biblioteca Natzionale Catalana, s’est acumprida s’idea de leare profetu mannu dae custas atividades culturales.

Pro custas dies imbenientes, s’assòtziu at organizadu finas una trilogia de eventos pro afortire una borta de prus su ligàmene intre Sardigna e Catalugna, in particulare cun s’Alighera, intre mùsica e literadura. Est su chi at a tènnere logu is dies 20, 21 e 22 de su mese de Làmpadas in Bartzellona.

Presentatzione de Don Chisciote in Bartzellona. Claudia Loi, Giagu Serreli e Pepe Coròngiu
Presentatzione de Don Chisciote in Bartzellona. Claudia Loi, Giagu Serreli e Pepe Coròngiu

Lunis 20 a is 7 de sero in su Saló del Vigatà de su Palau Moja (Portaferrissa 1), cunferèntzia de s’istòricu Aldo Sari «Art Català a Sardenya i l’Alguer», e presentada de s’ùrtima regorta de poemas de s’iscritore Guido Sari, «Els ocells màgics i Preludis, simfonies i impromptus». Patrotzinadu dae s’Agència Catalana del Patrimoni Cultural e su Consell Nacional de la Cultura i dels Arts.

Martis 21 a is 10 de sero in s’Absenta del Raval (Pes de la Palla 5), sa cantautora Claudia Crabuzza, acumpangiada dae sa ghitarra de Caterinangela Fadda, presentat su discu nou suo “Com un soldat”. Unu biàgiu iscritu e contadu in aligheresu peri sa vida de una fèmina-mama-cumbatente.

Su mèrcuris 22 a is 7 de sero in s’Auditori de Vilaweb (Ferlandina 43), Joan-Elies Adell presentat su libru suo “Guia sentimental de l’L’Alguer”. Su libru nos oferit su chi is ghias turìsticas e is fògios informativos no nos ant a pòdere contare mai: is incantos cuados, is testimòngios de is abitantes, is regordos acapiados a una traditzione culturale e gastronòmica comuna o is imàgines prus ecisadoras de unu logu in ue is cadalanos de ponente s’agatant semper comente in domo issoro.

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *