Giòbia, su 26 de cabudanni de su 2013, in su Museu MAN de Nùgoro, dae sas 15.30 a sas 18.30, b’at a èssere sa manifestatzione “Die europea de sas limbas” , ammaniada dae s’Ufìtziu de sa Limba Sarda de sa Provìntzia de Nùgoro, cun s’agiudu de sa Regione Sardigna e de su MAN.
Sa manifestatzione est in intro de una filera de atziones promòvidas dae sa Regione Sardigna pro alabantzare sa Die europea de sas limbas, pro mèdiu de sa presentada de unas cantas tradutziones in sardu, publicadas como a ùrtimu, segundu su programma chi si bidet in sa locandina, in sas tzitades de Casteddu, Tàtari e Nùgoro.
S’Ufìtziu de sa Limba Sarda de sa Provìntzia de Nùgoro, in collaboratzione cun su Museu MAN, presentat Su Corsaru Nieddu e Su Giornalinu de Giamburrasca.
Partende dae sas tradutziones de Su Corsaru Nieddu e de su Giornalinu de Giamburrasca, b’at a àere giogos linguìsticos pro sos minores, leturas animadas in sardu pro nch’intrare in unu mundu de fantasia e ispàssiu in ue sos pitzinnos ant a interagire cun su libru, imbentende.lu dae nou cun paràulas e figuras e lassende.si.nche leare dae s’immaginatzione.
In totu s’Europa, 800 milliones de europeos, rapresentados dae su Consìgiu de Europa cun 47 Istados membros, sunt incoragiados a imparare àteras limbas, a ogni edade, intro e foras de sas iscolas. Essende cumbintu chi sa diversidade linguìstica est una crae pro megiorare sa cumprensione intre sas culturas e chi est un’elementu fundamentale de sa richesa culturale de su continente nostru, su Consìgiu de Europa promovet sa pluralidade in totu s’Europa.
S’intrada est lìbera.
Informatziones e prenotatziones:
MAN_Museu de arte Provìntzia de Nùgoro
Carrera de Sebastiano Satta 27 – 08100 Nùgoro – tel +39.0784.252110
Oràriu: 10:00 – 13:00/15:00 – 20:00 (Lunis tancadu)