Sa Regione no at a fàghere pro ocannu sa cunferèntzia annuale de sa limba sarda (prevèdida dae sa lege) e sos ativistas de su Coordinamentu pro su Sardu Ufitziale si autoconvocant. Lunis chi benit, pusticras 8 de nadale, s’addòbiant in Casteddu (hotel Regina Margherita, sala Stampace, dae sas 9 e pro totu su mangianu) militantes e amantiosos de su Movimentu Linguìsticu pro apretare s’istitutzione regionale imputada de non pònnere aficu bastante in sa chistione de su bilinguismu.
S’elencu de sas chèscias est longu: su servìtziu limba sarda l’ant lassadu sena diretore pro paritzos meses e b’at dudas subra sa professionalidade seberada pro lu ghiare, su pranu Triennale 2014-16 no est istadu galu presentadu, s’Osservatòriu regionale est firmu, s’assestamentu de bilantzu at segadu totu sos fundos istantziados, a sos ufìtzios linguìsticos non l’ant dadu s’agiudu de àteros annos, su sardu pro ocannu est iscumpartu dae su curriculu iscolàsticu, no est sa crara sa positzione de sa giunta in contu de Limba Sarda Comuna (standard ufitziale iscritu de su sardu seberadu in su 2006 dae Renato Soru) e, timent sos organizadores, b’at su perìgulu chi si torret a una polìtica de dialetizatzione e de folclorismu chi cherent unos cantos cussigeris regionales. Sas propostas cuncretas de su CSU sunt unu invitu a sa Regione a propònnere una modìfica de s’Istatutu Ispetziale (pro si nde leare sas cumpetèntzias de s’iscola) e sa creatzione de un’agèntzia linguìstica subra su mollu de àteras minorias. Sena sa cale sa polìtica linguìstica ata a èssere semper mutza.
Pro totu custas resones e àteras, su Coordinamentu at aparitzadu sa “Cunferèntzia Natzionale” sua pro denuntziare su fatu chi sa Regione non fatzat sa sua (a òbligu a norma de s’art. 11 de sa lege 26/97). Sa punna est cussa de non fàghere abbrandare s’atentu a subra de una chistione in sa cale in sos ùrtimos annos si sunt fatos passos medas a in antis e chi como, si timet, potzat torrare in segus.
Su tìtulu dadu a sos traballos est <Limba Standard e Minorias Linguìsticas> cun duas partes in programa: una de aprofundamentu iscientìficu e s’àtera polìtica. A pusti s’introduida de s’antropòlogu Roberto Carta (dischente de Placido Cherchi), sa paràula at a andare a sos istràngios Sabrina Rasom (ufìtziu linguìsticu de su comunu generale de sa Badde de Fassa) e a Christian Romanini (ativista furlanista chi traballat como in s’Arlef). Tancat sos traballos Pepe Coròngiu de su CSU.
A pustis dibàtitu e relatas abertu a totus sos militantes e esponentes polìticos e culturales de Coordinamentu e finas a grupos, movimentos e partidos chi lu cumponent.
S’assemblea at a leare detzisiones in contu a s’istrategia de pigare sos meses chi ant a bènnere.
s’hotel Regina Margherita est in arruga Regina Margherita 44
http://www.hotelreginamargherita.com/
Leave a comment