Sa chistione de sa limba unitària est torrende de atualidade meda cun opiniones polìticas chi essint a fùrriu. Dae cando, in un’ordinàntzia reghente de sa Corte Costitutzionale, est essidu a fora s’argumentu chi su sardu non podet èssere reconnotu a manera prena si no at un’istandard ufitziale, sos polìticos sunt pighende positziones prus craras. Sa Limba Sarda Comuna, su còdighe iscritu unitàriu de su sardu chi sa Regione at adotadu in su 2006 (e chi sa Giunta Pigliaru Firino at una pagu postu a banda) est torrende a leare alenu.
Finas Ganau, presidente de su Cussìgiu Regionale, e Frantziscu Sedda, segretàriu natzionale de su Partidu de sos Sardos, ant naradu chi tocat a agatare una solutzione a su problema. In antis de oe aiant declaradu s’apògiu a sa LSC àteras formatziones de s’àrea indy comente Libe.R.U., Sardigna Natzione e FIU.
Est de custas dies sa declaratzione de Gianluca Collu, segretàriu natzionale de su partidu indipendentista Progetu Repùblica de Sardigna, chi in su profilu suo de Facebook at ghetadu paràulas comente pedras de cantone a favore de sa chistione de s’unitariedade de sa limba natzionale. Una lìnia in favore a su protzessu de istandardizatzione chi custu partidu est mandende a in antis dae unos cantos annos.
Segretàriu, sa limba sarda est ismentigada a bias dae sos partidos italianistas de guvernu e de opositzione. Ma est de aberu gasi importante?
Sa limba sarda est su bene immateriale prus de importu chi tenimus. Est intro sas cumponente fundamentales chi donant deretu a unu pòpulu, a una natzione, de si definire gasi.
Ma sa Limba Sarda Comuna est una proposta galu vàlida o b’at galu de traballare pro lòmpere a s’unificatzione finale?
In cunforma a custu argumentu penso chi su traballu acumpridu cun sa proposta de sa LSC siat istadu de seguru “istòricu” e chi, sena duda, in s’istòria sarda, non b’at àpidu mai una cosa gasi de fundamentu. Est una base chi non si podet istransire subra sa cale sighire s’elaboratzione pro definire una grafia chi totu sos sardos si potzant reconnòschere sena campanilismos ridìculos e anacronìsticos.
Cale est sa fortza de sa Limba Sarda Comuna?
Cun s’istùdiu de unu istandard linguìsticu si sunt postas sas premissas pro comintzare s’impreu curretu in sos ufìtzios pùblicos e, fatu galu prus de importu, pro s’insignamentu de sa limba sarda in sas iscolas.
E tando cale sunt sos impedimentos?
Pro fàghere a manera chi sa limba sarda non si nch’isperdat in duas generatziones no est pretzisu a tènnere una limba perfeta, est pretzisu a tènnere una limba bia; pro custu est a òbligu a fàghere a manera chi sa limba non depat èssere una mera e sìnchera matèria de istùdiu, ma finas limba veiculare in totu sas comunicatziones istitutzionales, in s’universidade e in s’iscola in s’insignamentu de àteras matèrias.
Una limba folklorìstica in iscola comente l’at cherta Firino in custos annos?
No. Non s’insignamentu de su sardu ebbia, ma s’insignamentu in sardu. E torro a repìtere “in sardu”.
Cale sunt sos pecos in sa chistione LSC?
Sos sinnales chi bidimus in sas sotziedade e in sas istitutziones sardas non sunt bonos: su movimentu linguìsticu paret partzidu in una cuntierra tècnica chi at postu in abbas malas su traballu fundamentale de custos ùrtimos annos.
Totu curpa de sos ativistas?
Pro cantu pertocat oe in die sa Giunta Pigliaru non si podet bajulare su lassismu in custu tema, cosa chi arriscat de de pònnere una losa a gisa de tumba in subra de sa LSC.
Est ora de cambiare o sighimus gasi?
Est una situatzione chi non podimus prus atrogare, ca sos giòvanos ant su deretu a una formatzione cumpleta e plurilingue, sa natzione sarda at su deretu a una limba sarda parificada e ufitziale. Un’istandard gràficu unificadu pro sa limba sarda est giustu, doverosu e non si podet prus istransire.
gpc
Leave a comment