Chida chi benit torrat "Il sardo una lingua normale" in Bauladu

Chida chi benit torrat "Il sardo una lingua normale" in Bauladu
IMG_8740
Prima presentada ufitziale de su libru – Casteddu, sant’andria 2013 . Unione Sarda

Sa recuida de ‘Il sardo una lingua normale’. In Bauladu, chenàbura chi benit 23 de ladàmine-santu gaine, si torrat a presentare su libru de Pepe Coròngiu chi at fatu, in su bene e in su male, s’istòria de sa polìtica linguìstica de custos ùrtimos annos.

S’apuntamentu est pro sas 18.00 in sa biblioteca comunale. Presentes, paris cun s’autore, Gonario Carta, titulare de s’ufìtziu linguìsticu comunale, Luca Cadeddu Palmas e su sìndigu Davide Corriga.

Carta at a relatare in pitzu de su libru e de seguru at a ispuntzonare a Coròngiu pro li fàghere contare su pro ite e su comente de unu libru chi, cando est essidu duos annos como, at pesadu unu muntone de abolotu e bèndidu 3 mìgia còpias, custringhende s’editore Condaghes a imprentare sa segunda editzione e finas sa versione eletrònica de s’òpera. In medas ant iscritu chi, a cajone de su chi at iscritu, s’iscritore lacunesu apat pèrdidu sa diretzione de su servìtziu limba in sa Regione.

Coròngiu at declinadu e isvilupadu, in sas 270 pàginas,,sa mirada sua pessimìstica de sa chistione de sa limba sarda. Una situatzione mala a beru cun sa populatzione presonera de totu sos pregiudìtzios dialetales e antigòrios creados dae sas elites antisardas. E comente si custu no esseret bastante, Coròngiu at imputadu a su movimentu linguìsticu de no èssere a s’artària de sa missione istòrica sua. Sa sìndrome de Istocolma est evidente e crara finas a dies de oe. Mescamente in sos liders betzos e in sos separatistas campidanistas.

Sa presentada noa at a èssere s’ocasione pro averguare su tempus presente de sa polìtica linguìstica pustis totu sos avenimentos de custu annu e mesu. Sa dispidida de Coròngiu dae sa diretzione de su servìtziu linguìsticu regionale, sa sopressione de custu cun s’acorpamentu a editoria, su declassamentu a servìtziu de livellu bassu. In fines, una polìtica linguìstica chi no agatat una dimensione noa, nè indiritzos noos, bivende semper in un’istadu eternu de isetu de non s’ischit ite.

Finas sas initziativas prus fortes de sa Regione, comente sas normas de atuatzione e su sardu in iscola, non parent a tretu de megiorare sas cosas. Ca mancant de fundamentu in una lìnia crara e detzisa de polìtica linguìstica. Parimus torrados a coa de deghe annos a una restauratzione sena sentidu perunu si non cussu de segare sas ancas a s’òmine pro segare però su progetu de istandardizatzione de su sardu.

Sa novidade prus manna de custos ùrtimos annos paret sa fundatzione e s’afortiamentu de su CSU (Coordinamentu pro su Sardu Ufitziale), sòtziu de opinione e pressione a favore de su bilinguismu ufitziale, de su cale Corongiu est unu de sos animadores prus cumbintos.

Sa resessida manna de totu sas propostas de su CSU (ùrtima cussa de sa Festa de sa Limba de Òschiri) ponet a sa polìtica linguìstica (e a sos atores de su movimentu linguìsticu) una chistione de importu.

Est cussa chi si est su CSU s’ùnicu capatzu de mobilitare sa gente a ite servit unu servìtziu limba sarda e a ite servit a gastare dinare pro ufìtzios gestidos in un’òtica munitzipalista e imprenditoriale? Sena una regia generale? Sena unu cumbinchimentu e una mobilitatzione reale de sa populatzione?

In Bauladu chenàbura chi benit s’ocasione pro torrare a arresonare de custos temas dìligos a manera dereta cun s’autore de un’òpera iscrita de primore chi, a dies de oe, est semper atuale e in possa.

Antzis, paritzas prenetas iscritas in su libru de su 2013 si podent averguare chi sunt acadessidas.

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *