Su CEAMAL est su tzentru de educatzione ambientale de sa Comuna de Lodè chi at sa punna de fàghere connòschere non su patrimòniu naturale ebbia, ma fintzas sos mudamentos chi naschent dae s’atzione de s’òmine in sa Natura. Gràtzias a su cuntributu de sa Regione Sardigna su CEAMAL at ammanitzadu una filera de letziones (totu sena gastu perunu pro sos dischentes) in sas iscolas de sa Provìntzia de Nùgoro pro promòvere àndalas educativas chi animent sos pitzinnos a connòschere sas energias rinnovàbiles e s’impreu responsàbile issoro, in un’òtica de respetu e de su costou de sa Natura.
Sas letziones comintzant faeddende de sa galàssia, mustrende cun materiales multimediales su sistema solare e isprichende.nche sa nàschida. A pustis si sighit cun acrarimentos subra de su sole e de sos pianetas, fintzas a cròmpere a faeddare de sa terra e de sa luna, chi est pro sos pitzinnos semper unu tema ammaghiadore. Custa istèrrida serbit a su reladore, s’astrònomu nugoresu Manuel Floris, a nàrrere a sos pitzinnos comente arribat a sa terra s’energia solare e de comente issa siat sa cajone de su tziclu de s’abba (su sole caentat – ispaporamentu – nues – abba – benas/rios – mare) e de sa sa fotosintesi clorofilliana: in una paràula, de sa bida.
Ispricadu custu si colat a chistionare de sos combustìbiles fòssiles (nàschidos dae fundos e animales mortos milliones de annos a como) e de s’efetu serra chi nde dipendet dae s’anidride carbònica e de comente sas energias rinnovàbiles che a s’energia eòlica, solare fotovoltàica e solare termodinàmica serbint a nos non fàghere dipèndere dae su petròliu, a minimare sas emissiones de CO2 e duncas a minimare s’efetu serra e in fines a mantènnere s’ambiente prus pulidu.
- Tzentru de Educatzione ambientale de sa Comuna de Lodè
