Sarbadore Acàmpora (29 annos, de Lanusè, archeològicu e operadore culturale) est su segretàriu nou eletu de ProgReS – Progetu Repùblica. Su Cungressu natzionale de sos ativistas l’at inditadu paris a s’iscuadra sua e, a su matessi tempus, at seberadu a Omar Onnis che a Presidente e mallevadore de su Manifestu Polìticu bogadu a campu in sa mangianada de traballos.
In antis aiat faeddadu Bobore Bussa (chi dae pagos meses aiat leadu sa ghia de sa fase de nàschida de su movimentu printzipiada cun s’assemblea de su 2 ghennàrgiu 2011 in Santa Cristina), chi at contadu de sas àndalas sighidas pro lòmpere a su Cungressu, sende chi at abertu su resonu cun rapresentantes de àteras formatziones polìticas subra de s’optzione indipendentista-soberanista comente alternativa a s’autonomismu. Bussa posca at imbiadu unu saludu a s’Ogiastra ammentende su fatu lastimosu e feu de Chirra. In còngruos de s’incàrrigu suo at dadu sas bonas uras a su segretàriu nou cando chi at espressadu su cuntentu mannu suo pro sa boluntade de totus de dare agiudu a sos giovanos, finas ponende aficu in unu progetu polìticu e de guvernu pro sa Sardigna chi siat annoadore e de giudu.
Acàmpora, no intames apat praticadu in polìtica de paritzos annos, est su prus giòvanu segretàriu de partidu de s’istòria de Sardigna e, finas in Europa, intre sos prus giòvanos. A bisu de su partidu indipendentista, s’eletzione de unu pitzocu de 29 annos est unu acadessimentu naturale, sende chi bi serbit, a tempos de oe, gente chi si movat pro sa comunidade, finas ca b’at pitzinnos medas chi torrant a seberare su disterru e sende chi ProgReS – Progetu Repùblica est unu partidu fatu mescamente de giòvanos.
A sos Summit ARBATAX 2011, su sgretàriu nou at faeddadu de su tinu de issòrvere s’andanta mala de sas cosas in sas cussòrgias de Sardigna chirchende de barigare una polìtica fata petzi de chèscias. Pro Acàmpora, sas propostas diferentes s’ant a dèpere chìnghere pro fraigare unu progetu de guvernu beru de sa Regione, ma finas de una Repùblica de Sardigna imbeniente.
Leave a comment