Torrant a comintzare, pustis unu mese e mesu de pasu, sas presentatziones de su libru de Giuseppe Corongiu ‘Il sardo una lingua normale’. Sàpadu 22 santandria s’addòbiu est in programa in sa biblioteca comunale de Lùvula (Nùgoro) a oras de sas 17.30. Paris cun s’autore ant a èssere s’operadore linguìsticu Màriu Sanna e s’assessore comunale de sa cultura Pietro Pittalis. At organizadu sa bibliotecària Maria Teresa Rosu.
Cun custa serada su libru de Coròngiu, torrat a girare peri sas biddas de Sardigna. Su ‘tour’ at a sighire pro bona parte de su 2015. Àteras presentatziones sunt in programa a coitu in Sant’Antiogu, Cuartùciu e Terralba. Sa prima presentatzione si fiat fata belle un annu como in Casteddu, in sa sala de L’Unione Sarda.
Chie est interessadu a presentare su libru podet cuntatare s’editore (Condaghes de Casteddu) o s’autore. S’initziativa est a s’in donu e non costat nudda a chie l’organizat.
