de Sarvadore Serra –
S’ùrtima novidade de Papiros est in campu pro si la godire totu sos chi lis agradat a lèghere in sardu. Sa sotziedade editoriale ghiada dae Diegu Corràine at bogadu a lughe su nùmeru 15 de Eja, rivista chi faeddat de limbas, natziones, culturas, cun noas, documentos, intervistas. S’intervista de custu nùmeru est a Jeanne Perego, iscritora e giornalista, chi at iscritu unu libru dedicadu a Papa Frantziscu, “Il nostro amico Jorge”, “Jorge, s’amigu nostru”, publicadu in italianu e pustis bortadu in limbas medas, in mesu de custas su sardu.
Giuanne Luisu Stochino, imbetzes, nos faghet unu raportu giornalìsticu subra de sa polìtica linguìstica in Euskadi, cando chi Vissente Migaleddu nos avertet de su perìculu de su petròliu incuinante in Sardigna. Chie l’agradat sa literadura internatzionale si podet lèghere su cumintzu de “Sas sorres”, contu bogadu dae “Dubliners”, “Dublinesos”, de James Joyce, publicadu in sardu dae Papiros in sa sèrie SenaLàcanas”.
Chie s’interessat de artesania, in càmbiu, podet lèghere “Artimanos, s’arte est in sas manos”, de Frantzisca Spiggia. E àteras cosas medas b’at in custa rivista chi tenet una gràfica de sas mègius, chi cuntentat sos ogros cun disinnos galanos, fotografias e un’acostiamentu dìligu de colores. Sena contare s’utilidade didàtica de custa publicatzione, chi a beru mèritat de intrare in totu sas iscolas.
Leave a comment