Su negatzionismu istòricu in Sardigna

Su negatzionismu istòricu in Sardigna

de Sarvadore Serra –

sardinia carta

 

Mama contaiat chi sos continentales li naraiant, a sa Sardigna, “terra bruciata”. Sa maistra contaiat chi sos continentales lis naraiant , a sos sardos, “zulù”. Siat craru, deo non tèngio nudda contra a sos zulù, chi sunt unu pòpulu sèriu e rispetàbile cantu sos sardos e cantu sos italianos.  Però custos sunt petzi duos esempros de un’atitùdine de minisprètziu  chi sos de foras ant tentu a s’ispissu cun sos sardos. Un’atitùdine pruriseculare, si est a beru chi in s’800 su barone Manno, cussigeri de su “Consiglio Supremo di Sardegna”, faeddaiat, pro sa Sardigna, de  “quell’onta antica di  essere sempre beffeggiata, o di restare perpetuamente ignota”.

No  est, custa, una casualidade o una brulla de su destinu. Ca totu sos pòpulos chi perdent s’indipendèntzia (e sos sardos l’ant pèrdida dae meda) devent sufrire custu  “bullismu” de sos pòpulos binchidores.  Ma custos ingiùrgios de pagu tràgiu sunt petzi sa punta  de un’iceberg de unu disinnu prus mannu: su de bìnchere psicologicamente su pòpulu giai bintu militarmente, cumbinchendeˑlu chi non balet e chi, in fines, li deghet a èssere dominadu.

Funtzionale a custu disinnu est su negatzionismu istòricu, chi tenet su mèdiu suo prus de importu in s’iscola: sos dominados non devent connòschere s’istòria issoro, o, nessi, non devent connòschere cussos fatos chi, connoschendeˑlos, andant contra a  su disinnu de domìniu. Duncas, in sos programas iscolàsticos, non si devet pònnere chi in sa Sardigna medievale b’at àpidu bator rennos indipendentes; non si devet pònnere chi in su 600 sa nobilesa sarda s’est bortada contra a sa monarchia ispagnola, cun èsitos  tràgicos chi nch’at giutu a  sa morte siat de su vitzerè siat de sos rebelles; non si devet pònnere chi in su 700 in Sardigna b’at àpidu una rivolutzione antifeudale.

Custu negatzionismu b’est fintzas in campu linguìsticu: su sardu no est una limba, narant,  ma unu dialetu;  e si puru est una limba est partzidu in dialetos, duncas non balet; e arguai a nàrrere chi in Sardigna amus tentu una lege sarda iscrita in limba sarda, sa Carta de Logu, chi est abbarrada in vigore fintzas a su 1827!

E sos sardos dominados ite faghent? Su prus no nd’ischint nudda. Ca in sos libros de iscola non b’at nudda. M’ammento chi, cando fia in sas mèdias, sigomente aia bidu chi su libru de istòria non faeddaiat de nois, aia pregontadu a sa professora. E issa, sica, m’aiat rispostu: la Sardegna era una colonia.

Ma b’at sardos chi connoschent s’istòria sarda, ca ant istudiadu in sos archìvios, o ca ant lèghidu sos libros iscritos dae sos chi ant istudiadu in sos archìvios. E custas pessones, a gherrant pro cambiare custa  situatzione?  Calicunu, anticunformista, eja. Ma su prus callant a sa muda, si puru no adderint a custu sistema ideòlogicu chi afirmat s’inferioridade de sos sardos. Ca no est prudente a si pònnere contra a unu sistema chi t’at dadu istipèndiu e podere.

Leave a comment

5 Comments

  1. Grazie Meda pro custu iscritu garrigu de cuscescia, nezessitamus de custa manera de idere s’istoria de su populu Sardu.

  2. mi piace e sono onorato di far parte della vostra-nostra storia vi seguo
    Gianni

  3. cessu cessu! za semus a frores!! semus inghiriados de s’innorantzia prena de s’istoria sarda. E a nemos nde l’importada de la konnoskede. Sa gana de indipendentzia abarrada isperu po pagos ki bi crèene finzamentas a s’akabu de sa vida issoro. Sa majorìa si nd’afutidi e pius peus si kerede taliana. S’isperu meu ainnantis de morrede de la idere franka e soberana, sighende gai, ad a abarrade isperu ebbia. Fintzas a kando no morzo appo a tzirriare INDIPENDENTZIA e boh!!!
    Azudu mannu benidi dae homines komente fostè e atteros ki la kerene franka e soberana. Agrascias a tottugantos!!

  4. “S’ignorantzia tua est su podere insoro” (cit.)

  5. Sas iscolas italianas in Sardinna an pesatu sardos chi son diventatos Mastros issos e totu, pro imparare a sos pitzinnos chi sa Sardinna non tenet istoria, chi est semper istata una colonia…autocolonialismu !

Send a Comment

S'indiritzu email tuo no at a èssere publicadu. Is campos pedidos sunt signados *