– de Sarvadore Serra –
Vissente Bacallar Sanna est istadu unu de sos polìticos sardos prus de importu de su Setighentos. Nàschidu in Casteddu in su 1669 e mortu in s’Aja in su 1726, cando fiat ambasciadore de Ispagna, est istadu unu grandu diplomàticu. A pàrrere de s’istudiosa tedesca Sabine Enders est issu chi in su 1714 at fatu imprentare su libru La Sardaigne paranymphe de la paix, (in sardu, Sa Sardigna, paralimpa de sa paghe), essidu anònimu. Àteras editziones (fintzas a su 1725) sunt istadas imprentadas cun su tìtulu Déscription géographique, historique et politique de la Sardaigne.
Como custu libru l’at torradu a publicare, traduidu in italianu, sa sotziedade editoriale Sardìnnia. In sa prefatzione Sabine Enders, tenende contu de proas documentales e interpretativas noas, atribuit su libru, in manera definitiva, a Vissente Bacallar Sanna. S’argumentu de su volùmene est s’ischirriòngiu imbeniente e definitivu de sa Sardigna dae s’Ispagna a pustis de sa gherra de sutzessione ispagnola e sa tzessione a un’àteru domìniu. In su tratadu de paghe de Utrecht de s’ 11 de martzu de su 1713, a Max Emanuel, duca e prìntzipe eletore de Baviera, l’aiant isseberadu comente re de Sardigna nou, e sa Paralimpa amparat custu disinnu, in manera apassionada, dae unu puntu de vista sardu. Ma contra a Karl von Habsburg, dae su 1711 imperadore de su Sacru Romanu Impèriu Germànicu, su bisu de su prìntzipe eletore de Baviera, nointames s’agiudu de Bacallar, non s’averat.
Su progetu de Max Emanuel aiat àpidu chertu nàrrere, pro sa Sardigna, sa soverania gasi meda disigiada suta de unu re suo ; fintzas Giuanne Maria Angioy, in s’agabbu de su Setighentos, at sutaliniadu sa modernidade de custu disinnu.
In s’ùrtima parte de su libru b’at un’apenditze cun lìteras inèditas de su conte Louis Joseph d’Albert – imbiadu bavaresu a Madrid – subra de unu disinnu segretu pro sa cunchista militare de s’ìsula, de atuare cun s’agiudu de sos disterrados sardos in Madrid pro incoronare a Max Emanuel re de Sardigna.
Ligàmenes: http://www.sardinnia.de/it/i-libri/volume-10-vincenzo-bacallar-sanna-la-sardegna-paraninfa-della-pace/
http://lanuovasardegna.gelocal.it/nuoro/cronaca/2013/05/07/news/la-storia-della-sardegna-in-baviera-e-a-vienna-1.7019798
Leave a comment