.- de Sarvadore Serra –
Narant chi sa bidda de Ollolai est istada sa capitale de una de sas Civitates Barbariae chi non si sunt rèndidas mai a sos Romanos e, in s’Edade Mèdia arta, at postu fronte a sos Bizantinos. Narant chi istaiat in Ollolai su cumandante barbaritzinu Ospitone, chi su Papa S. Gregòriu Magnu l’aiat iscritu una lìtera in su 594 pedendeˑli de agiuare a cunvèrtere a su cristianèsimu su pòpulu suo.
In s’Edade Mèdia arta sunt lòmpidos a cussos giassos unos cantos mòngios orientales divotos de Santu Vasili, e a unu monte de 1200 metros l’ant dadu su nùmene de su patronu issoro. Galu como si narat Monte de S. Vasili. In unu baddigru de custu monte, in mesu de sas rocas, b’at una crèsia dedicada a su Santu, a prus de unu chilòmetru e mesu dae sa bidda. Su fràigu chi b’est como l’ant fatu in su sèculu XV, ma sa crèsia forsis est nàschida in su tempus de sos Bizantinos, in pare cun unu monastèriu orientale su cale, a bias de su sèculu XII, paret chi l’apant ocupadu sos benedetinos.
In s’Edade Mèdia sa bidda de Ollolai faghiat parte de su Giuigadu de Arbarèe, e fiat capitale de sa curadoria omònima. Est abbarrada cun Aristanis finas a su 1420, cando su Giugadu l’ant annessu a su Rennu creadu in Sardigna dae sos Aragonesos e l’ant infeudadu a sos aristanesos Deanas. Dae issos est coladu a Lenardu Cubello (chi su sambenadu paternu fiat Bas-Serra) su cale l’at postu a fàghere parte de su marchesadu de Aristanis. In su 1470, a pustis chi sa famìlia de sos Cubellos s’est estinta, su marchesadu l’at eredadu su nebode issoro Lenardu de Alagon, su cale in su 1471 at permissu a sos Padres Frantziscanos de Aristanis de leare possessu de su monastèriu antigu de Ollolai, oramai abbandonadu e mesu derrutu. Sos Frantziscanos, narat s’istudiosu de s’800 Vitòriu Angius, ant fraigadu “su cumbenteddu de Ollolai a sa distàntzia de mesora dae sa bidda, in unu giassu galanu e ditzosu, coronadu dae matas e abbas lìmpias. In su 1472 su pìscamu castrense Padre Larentu de Moncada, de su matessi òrdine, at cunsacradu sa crèsia”.
In cussos annos in Ollolai b’aiat duas famìlias in disamistade, sos Arbaos e sos Lados. E est acuntèssidu chi in su 1490 unu giòvanu de sa famìlia Ladu, chi istudiaiat cun sos Padres, l’ant agatadu mortu in su putzu de su cumbentu. Gente meda at ghetadu sa neghe a sos Arbaos, narende chi in antis l’ant mortu e pustis nche l’ant ghetadu in su putzu pro si vengare de sos Padres chi fiant amigos de sos Lados. Sos Arbaos, però, si sunt negados e ant ghetadu sa curpa a sos Padres. Custos, sighit a nàrrere Angius, “sunt istados persighidos, e, timende a los ochìere, s’ant coladu notes medas in sos àrbores de su padente, e gasi ant sighidu, fintzas a cando su vicàriu generale issoro in Sardigna no lis at ordinadu de lassare sa bidda e de si nche ghirare a su cumbentu de Aristanis, a ue sunt lòmpidos su 3 de austu de su 1490.”
Pagas dies a pustis chi sos Padres sunt mòidos unu fogu mannu at destruidu su prus de sa bidda, cumintzende dae su bighinadu de sos Arbaos, e s’est pensadu chi a pònnere cussu fogu esserent istados sos Lados. Dae tando sa bidda at connotu unu tempus mannu de decadèntzia, e sa legenda faeddat de unu frastimu mannu chi sos Padres l’ant ghetadu cando si nche sunt andados.
Sa crèsia de Santu Vasili, chi sos Padres li naraiant de sa Madalena ca fiant mòidos dae su monastèriu de sa Madalena de Aristanis, l’ant restaurada prus de una bia e cada annu si bi faghet sa festa de su Santu su 1 de cabudanni, a pustis de sa noina.
Ligàmenes:
http://www.lacanas.it/2014/03/07/il-culto-di-san-basilio-sulla-montagna-di-ollolai/
https://it.wikipedia.org/wiki/Ollolai
http://www.sardegnadigitallibrary.it/index.php?xsl=626&id=11118
http://www.labarbagia.net/focus/storia/1844/la-chiesa-e-il-convento-dei-francescani-a-ollolai-dove
Leave a comment
Vene meda.
Parede chi parte de sa gente de Ollolai pustis de sa dismistade si che siada andada a desulo,ne est testimonianza Sambenaos ollolaesos presentes in Desulo,Daga Frau Casula,poi in su trighignu de olaccio si festada santu Asili senza baere cresia e dae sa gente de olaccio benidi cunsiderau ancora oe cantu sa madonna de su cramu patrona de su trighignu,in una pubblicazione don Bussu contada ca meda gente de desulo finas a sa fine de 800 po sa ricorrenza del is morto andada dae desulo Ollolai