Sèberos de Sarvadore Serra
leados dae s’òpera Sos vantos de su machine (Stultitiae laus)
de Eràsimu de Ròterdam traduida in sardu dae Albino Pau
e publicada dae Condaghes in su 2009.
A sa secura bi det aer tzente chi de custos ispàssios non ne cheret intenner e lis est bastante s’amaju e sa cumpantzia de sos amicos. Atrogant chi s’amistate est mentzus de calesiat bene; est goi de importu, narant, chi non lu sunt de prus s’àghera, s’aba e su focu. E in prus issa est una bena de cuntentesa chi non si ne potet facher a mancu, e chie diat cherrer de la ponner a banna, diat iscurire su sole de sa vita; a sas secus, bastante chi custu siat unu tema chi bi pertocat, vatut a s’òmine una dechitesa tale, chi tambene sos filòsofos no ant duda peruna a la ponner tra sos benes chi non si ne potet facher a mancu. Duncas, e si jeo dia atrogare chin iscritos chi tambene de custu naviu so prora e popa, siat a narrer de una prenna goi pretziata s’incumintzu e s’agabu?
Jeo n’apo a dare su cumprou, e non chin arrèjonos de lotràju, chin fartzas chistiones e àteras parinales artes de sa dialètica, ma bos apo a facher tocare chin manu, chin cudda saviesa ch’est làtina in Minerva, comente est avesu a narrer.
Leave a comment