Sèberos de Sarvadore Serra
leados dae s’òpera Sos vantos de su machine (Stultitiae laus)
de Eràsimu de Ròterdam traduida in sardu dae Albino Pau
e publicada dae Condaghes in su 2009.
Ma fintzas sa faina mea de su sèmene e de sa bena de sa vita diat potet esser cosedda de pacu imprastu si jeo non dia cumproare chi tambene totu sos benes chi sa vita nos donat benint pro su prus dae su bonucoro meu.
Chi poi, it’est sa vita de s’òmine? Ma justu est a li narrer vita, si ponimus a banna sos disaogos?
Vois tzocates sas manos. Non mi l’ischia, no! Nessune de vois potiat esser goi atinatu, o siat a narrer mentzus foras de contu, àntzias, a perdonare su tripògliu, esser tantu in tinu de aer àpitu un’idea goi.
Nemancu cuddos Istòicos aburreschent su recreu. Ja est veru chi issos sunt cuntinu in chirca de cuare sa cosa e, cara a sa tzente, si li gheretzant chin chentu agràvios, ma est làtinu chi lu fachent pro nch’irvortare a sos àteros e pro ne gosare issos in bunnàntzia manna.
Ma nàtzemi vois! Non diat esser a onz’ora sa vita trista, anneosa, dolimentosa, illoriata, irfadosa si non si bi diat amisturare su disaogu, ch’est su sale de su machine?
Leave a comment