Bìculos de filosofia #10 (Sos vantos de su machine)

Bìculos de filosofia #10 (Sos vantos de su machine)

Sèberos de Sarvadore Serra
leados dae s’òpera Sos vantos de su machine (Stultitiae laus)
de Eràsimu de Ròterdam traduida in sardu dae Albino Pau
e publicada dae Condaghes in su 2009.

Epuru chie non li diat cherrer assimitzare e esser unu conchi-irfassatu, chene un’untza de sale, ma semper allegru, semper tzovanu, semper in gana de regalare a totu ispàssios e disaogos, imbetze de esser su famatu Zove, deus abistu e tìmitu dae totu, opuru Pan, chi in onzi locu ispàrtinat assùconu e cuntribulatzione chin sas presentatas suas totindunu, opuru Vurcanu semper carragliatu de chisina e semper brutu pro su travàgliu suo de frailàgliu, o tambene Pàllade matessi chi ponet a timer chin sa Gorgone e sa lantza e cuntinu si mirat a totu a incorratura? Pruit’est chi Cupidu abarrat semper pitzinnu? Pruite? Ma pruite ca no est bonu a nudda, unu chi non fachet e non pessat mai cosa de imprastu. Pruite sa Vènere indorata semper rennoat sa galania sua che a su veranu? Est làtinu. Issa s’est imparentata chin mecus e in cara juchet su colore brundu de babu meu, e pro custu est chi Omeru li narat s’indorata Afrodite. E tambene pro custu issa juchet semper su risu in lavras, assumancu si devimus creder a sos poetas e a sos ghetapare issoro, sos iscarpeddatores.

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *