Tres sardos pro un’iscoberta de importu

 – de Sarvadore Serra –

B’at tres sardos (in totu sunt 5)   in su grupu de istùdiu chi at mustradu  pro ite no andat bene unu mètodu pro cambiare sa cumpositzione chìmica de sas  nanu-partìculas magnèticas. Est un’iscuadra de fìsicos, chìmicos e ingenieris ghiada dae  Andria Falqui, casteddaju, professore in sa  Kaust University de s’Aràbia Saudita; in pare cun Falqui ant  traballadu Albertu Casu e Dàvide Deiana; totus ant istudiadu in s’Universidade de Casteddu, ma si nche sunt dèpidos andare a foras pro traballare; de su grupu nde faghent parte fintzas s’ispagnolu  Sergio Lentijo-Mozo e s’italiana Elisa Sogne.

Sos resurtados de su traballu los ant publicados in sa revista “Chemistry of Materials”, (“Chìmica de sos Materiales”). “Unu de sos disìgios de chie faghet custos istùdios – narat  Falqui – est su de bogare a campu nanu-partìculas  chi tèngiant totus sa matessi mannària, forma e cumpositzione chìmica. Custu diat permìtere de las impitare cun profetu mannu in unas cantas aplicatziones, comente, pro nàrrere, sas aplicatziones biològicas. 5 annos a como  un’artìculu publicadu  in un’àtera  revista aiat mustradu unu mètodu  pro lòmpere a custu resurtadu. Ma cun su traballu nostru – agiunghet Falqui – amus mustradu  chi cussu mètodu no andat bene, ca non permitet de controllare sa cumpositzione chimica de sas  ‘nanu-isfereddas’”. Falqui at craridu fintzas chi  “custa impossibilidade  dipendet dae paràmetros fìsicos pretzisos ligados a s’istrutura  de sas isfereddas”, e congruit narende: “deo so cuntentu mannu chi unu grupu interdisciplinare, chi nde faghent parte tres fìsicos sardos disterrados, apat pòdidu contrariare un’artìculu gasi de importu, agiunghende unu puntu de fundamentu in s’istùdiu  de sos mègius mètodos  de sìntesi de custos materiales”.

Ligàmene: http://www.sardiniapost.it/innovazione/tre-fisici-sardi-confutano-un-metodo-modificare-nanoparticelle-magnetiche/?fbclid=IwAR2yphx5EOIjGK4jYPewHL-SlDsSKf04sJeDeoZQtXK3c-sUPwcf0Dmkz94

Lassa unu cummentu

S'indiritzu email tuo no at a èssere publicadu. Is campos pedidos sunt signados *

*