Trasportos: narant chi b’aiat un’acordu…

S'ìsula de Taulara
S’ìsula de Taulara

S’AGCM (S’Autoridade  Garante de sa Cuncurrèntzia e de su Mercadu) at detzisu de multare bator cumpangias de trasportos: sa Moby, sa SNAV, sa GNV e sa Marinvesto, pro s’esserent postas de acordu a mantènnere artos sos prejos de sos billetes. Custu acordu diat èssere istatu fatu in s’istiu de su 2011, cando sos prejos pro Civitavecchia-Terranoa, Gènova-Terranoa e Gènova-Portu Turre sunt artziados prus de su 65%. Custu acordu lis at a costare a su nessi 8,1 milliones de èuros: custa est sa multa detzisa dae s’Autoridade.

S’acusa est istada fata dae sa Regione Sardigna, dae sa Regione Ligùria e dae unos cantos sòtzios de consumadores: pro issos est duncas una bìnchida de importu mannu in sa gherra de sos trasportos.

Compudende su chi b’at capitadu duos annos a como si notat chi  a manera mèdia sas tarifas de sa Civitavecchia-Terranoa e de sa Gènova-Terranoa ant ismanniadu de su 42% e de sa Gènova-Portu Turre de su 50%.

Custa crèschida de prejos non torrat, mancu tenende contu de s’aumentu de sa nafta e de sas pèrdidas de bilantzu de sa cumpangias: sa sola ispricatzione est chi intre de sas sas bator sotziedades b’at àpidu un’acordu.

Custa cundenna podet èssere de profetu ca s’at a pòdere impreare fintzas pro sa vertèntzia chi pertocat sa continuidade territoriale e pro fàghere sapire a sos de su Guvernu ite cumportat s’isularidade de sa Sardigna.

Su chi ispantat est: ma b’aiat bisòngiu de duos annos pro cumprèndere chi b’aiat un’acordu?