Est su primu cantieri acumpridu de su caminu Tàtari Terranoa su chi Pedru Ciucci, amministradore ùnicu de s’Anas e Ugo Capellacci, Presidente de sa Regione Sardigna ant abertu.
S’amministradore Ciucci at ammentadu cantu , a pàrrere suo, sa Sardigna est de importu pro s’Anas: “inoghe b’amus traballu pro 1,3 milliardos de èuros: un’impinnu mannu chi mustrat chi nos sapimus de sas dificultade in sos trasportos chi bi sunt in su Norte de sa Sardigna”
Ciucci at asseguradu chi sos traballos ant a èssere cunsignados intro de su 2017, e sa tzitade at a èssere collegada cun sa 131 DCN intro de su mese de làmpadas de su 2014.
B’at chèrfidu noe meses a adderetzare e a pònnere in seguràntzia su Ponte, fraigadu in su 1940, at ispricadu su capu Cumpartimentu Sardigna Oriele Fagioli. Su ponte est longu 140 metros, est istadu allargadu e como si bi podet colare in ambas bias, pro sa cuntentesa finas de sos chi istant in Murta Maria, chi bi lis cheriat 20 km pro nche lòmpere a Terranoa.
A sa segada de su nastru ant leadu parte finas s’Assessore Regionale de sos traballos pùblicos Ànzela Nonnis, su Vitze presidente de sa Provìntzia Pedru Carzedda,su Sìndigu de Terranoa Giuanne Giovannelli, e sos rapresentantes de s’impresa Àngius chi comente ant naradu Capellacci e Giovannelli “ant respetadu sos tempos de cunsigna, mancari totu sas dificultades chi ant tentu, custu mustrat chi finas in Sardigna b’at impresas chi traballant a dovere e respetant sos tempos”
de Jorgi Rusta