Su 23 e su 24 de cabudanni, in Bonàrcadu, festa de sa limba sarda ufitziale

Su 23 e su 24 de cabudanni, in Bonàrcadu, festa de sa limba sarda ufitziale

“Festa de sa Limba Sarda Ufitziale” in Bonàrcadu su 23 e 24 de cabudanni in ocasione de sa Die europea de sas  Limbas promòvida dae su Cussìgiu  de Europa.  Referente pro s’organizzatzione  in Sardigna  est su Coordinamentu pro su Sardu Ufitziale (Csu), assòtziu formadu  dae istudiosos e ativistas. Su  tema de sa de bator editziones de sa festa (sas àteras sunt istadas in Sèdilo, Òschiri e galu Bonàrcadu) est su Testu ùnicu Limba Sarda. Su Csu non cuat sas crìticas suas: “Si sa lege la diant aprovare gasi comente est – narat Pepe Coròngiu, portaboghe de su Csu – bi diat àere  unu passu a dae segus  mannu fintzas cunforma  a sa tutela unitària previdida dae sa lege istatale 482/99. Diamus lòmpere a su paradossu chi s’Istadu defensat  su sardu e sas àteras limbas de Sardigna prus de sa  Regione. Sa lege cheret refudada o torrada a formulare fintzas pro istransire impugnativas romanas”.

In Bonàrcadu ant a faeddare fintzas de chistione feminile, de poesia, de istòria medievale, de libros, de automatzione eletrònica cun s’impreu de su sardu, de esperièntzias professionales, de tradutziones , de isport, de tzìnema. In previsione b’at fintzas  projetziones, esibitziones musicales, una mustra de produtos e màndigu de su logu. Sa manifestatzione est organizada in collaboratzione cun sa comuna  de Bonàrcadu e unos cantos assòtzios culturales Cumintzat a sas 5 de merie de sàbadu 23 de cabudanni in sa  sala de S’Ortu Mannu in Cursu de  Itàlia. Sos traballos sunt prevididos fintzas pro domìniga mangianu cun s’aprovatzione  de unu documentu  subra de sa lege, de presentare a sa Regione.

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *