Sa crèschida manna de sos dispositivos mòbiles

Sa crèschida manna de sos dispositivos mòbiles

de Sarvadore Serra

Steve Jobs l’aiat naradu: sos dispositivos mòbiles ant a bìnchere sos elaboradores personale. Issu aiat impreadu custu tèrmine: “era post-EP”. E como b’est istadu su surpassu: b’at  prus dispositivos Android in su mundu chi no aparatos Windows. Cunforma a sos datos de StatCounter, Android est lòmpidu a su 37,93% de impitadores, cando chi sa prataforma  de Microsoft  abbarrat a su 37,91%. Ma, a parte sos nùmeros, su chi importat est sa tendèntzia: Windows est semper minimende dae su 2011, cando chi  Android est semper aumentende.

Pro ite custu fenòmenu? Sa fine de sos elaboradores est custa? Jobs aiat paragonadu  sos elaboradores  a sos càmion, e sos telefoneddos  a sas veturas: “In antis totus  impitaiant  sos càmion  pro totu;  pustis, però, sas veturas sunt devènnidas prus populares. Deo creo chi sos elaboradores personales ant a èssere comente sos càmion: los at a sighire a impitare unu nùmeru limitadu de pessones”.

Sa veridade est chi non podimus campare sena su telefoneddu, ma sa matessi cosa non si podet nàrrere de s’elaboradore. E custu fatu si rifletit cun craresa in sas bèndidas,  pro more de sa crèschida de s’economia  in unos cantos paisos asiàticos  chi tenent mercados enormes  e si sunt ghetende in massa a sa prataforma  Android. Est acuntessende sa matessi cosa  cun iOS, su sistema operativu mòbile de Apple

In custu cuntestu non faghet ispantu sa detzisione  de Samsung de presentare su DeX, un’atzessòriu de Galaxy S8 chi lu càmbiat, de fatu, in un’elaboradore de mesa. At a èssere custu su venidore de sos dispositivos? Apple, in una campagna publitzitària noa,  est giai presentende su  iPad Pro comente s’alternativa reale a sos portàtiles.  Però est seguru chi no at a agabbare s’impreu de sos elaboradores de mesa. Pro su chi pertocat sas tzifras, sa tendèntzia narat chi Android at a sighire a aumentare su nùmeru  de sos utentes ativos e Windows at a sighire a nde pèrdere in sa matessi mesura de como. In su matessi tempus, su surpassu marcat sa pèrdida de s’egemonia de Microsoft in su mundu de sos elaboradores, giai  cunsiderados in unu sentidu prus mannu. Ite sunt, si nono, sos  dispositivos mòbiles?

Ligàmene: http://tecnologia.elpais.com/tecnologia/2017/04/04/actualidad/1491296467_396232.html

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *