B’at medas chistiones interessantes in su contu de sa Regione chi, in custas dies, at negadu sos finantziamentos a unu film propostu dae su prèmiu Oscar (pro sos efetos ispetziales de Spider Man 2) Anthony La Molinara.
Segundu su chi ant contadu unos cantos blog, e finas L’Unione Sarda, una commissione chi depiat detzìdere sos contributos a sas iscenegiaturas propostas, no at giuigadu su film kolossal (produtzione italiana, americana e tzinesa) dignu de èssere agiudadu dae s’assessoradu de sa cultura.
Una làstima ca sa produtzione de La Molinara est ispirada a su contu fantàsticu de Andrea Atzori ‘Iskida della terra di Nurak’ e duncas su film podet èssere mèdiu de promotzione mondiale de sa Sardigna e de sa cultura sua.
Una làstima galu prus manna ca in su progetu fiat prevèdidu un’impreu massissu de su sardu e finas s’idea de dopiare totu s’òpera in sardu pro la fàghere tzirculare in Sardigna.
Est pro cussu chi sa domo editoriale Condaghes, chi at publicadu su libru de Atzori e est promovende sa produtzione, non l’at pigada bene meda. At annuntziadu s’atzessu a sos atos e finas unu ricursu a su TAR.
Custu est in sos deretos de imprendidores chi cherent defensare s’òpera issoro, ma est dàbbile meda posca chi sos pabiros siant totus a postu. E chi siat totu legale. Amus a bìdere. Sa chistione est, comente semper, prus complicada e trumentosa.
Cando si narat in sa lege e in su bandu chi est sa ‘Cultura sarda’ chi depet èssere promòvida non s’ischit mai sa definitzione de custa cultura sarda. E duncas cales sunt sos mèdios pro la difùndere in su mundu e in logu nostru. Una cosa galu prus istròlica ca non s’atzetat chi siat sa limba sarda sa làcana de custu cuntzetu.
B’at duos fatos de printzìpiu. Su primu est chi su tzìnema sardu òperat in su mercadu italianu e sos registas, cando faghent òperas, ant cussu comente mundu de riferimentu. Segundu e cunsighente chi est sa ‘mirada’ italiana chi cunformat su tzìnema sardu, gasi comente càpitat in literadura. Duncas, pastores, bandidos, mare, turismu andat bene. Ma unu fantasy hollywoodianu in sardu, in cunforma a custa idea de Sardigna, est un’istramberia, una faina de genere e de serie B.
Non si medit imbetzes sa possibilidade de bortulare su giogu. Si timent custas produtziones populares e commertziales ca si ant in conca petzi sos film de autore italianos ebbia (pro su prus chi girant pagu e petzi in Itàlia).
Est s’ocasione duncas pro sas élites polìticas e culturales de meledare e si in casu de mudare sas règulas. O de sarvare cun àteros interventos finantziàrios custa òpera. Giovanni Manca e Frantziscu Cheratzu, sòtzios de Condaghes, est pretzisu chi sigant a cumbàtere pro fàghere custu film finas in sos tribunales si servit.
Nois amus a èssere cun issos ca paritzas bortas, a palas de s’idea de egemonizare sa cultura sarda, b’at petzi sa sòlita cultura surda de s’orientalismu e de s’autocolonialismu chi segat sas ancas a cale chi siat tentada de pòdere immaginare una Sardigna lìbera dae sas travas italianas.
E no est simple cumbinatzione chi sa limba sarda apat sa parte sua.
(dir.)
Leave a comment
Custhos de sa Regione Sarda no faghent mai nudda de seriu pro ajuare de aberu sa cultura sarda. Custhu film devet narrer de s’isthoria sarda e fintza in limba sarda? nono, no andat ‘ ene: troppo perigulosu, sos meres de Roma si podent arrennegare. E sos theracos sardo abbasciant sa conca e narant nono!
sos chi sunt in sa giunta parent pizinneddos a prima bessida no ischint fàghere unu passu sena preguntare sos palatos romanos, già semus acconzos, e deo chi apo iscritu unu libru subra sas cunditziones chi amus vividu in s’emigratzione de sos minadores in Belgio de sos annos 50, unos tantos chi l’ant leghidu m’ant nàradu – est puru interessante a nde fàghere unu film, Oi, oi, sa Sardigna sas cosas suas non sunt de importu.