“Betzos caros, a l’ischides chi nois de Ràdio Maria atzetamus fintzas sas làssidas de sos bios?”; “una làssida, mancari minore, nos andat bene”.
Paret chi siant paràulas chi in custas dies ant lèghidu betzos meda in sas lìteras chi ant retzidu e chi lis sunt istadas imbiadas dae “Ràdio Maria”, firmadas dae su diretore, su prade Livio Fanzaga.
In sa lìtera sunt fatas sete pregontas:
- Ses cuntentu chi Ràdio Maria t’informet a pitzu de sas làssidas testamentàrias?
- A l’ischis chi a sos parentes tuos at a restare comente si siat una cuota?
- A l’ischis chi pro fàghere unu testamentu ològrafu bi cheret petzi unu fògiu biancu e una firma?
- Ite ti faghet arreare a lassare parte de s’eredade tua a Ràdio Maria?
- Pensas chi siat unu gastu mannu o non tenes unu notàiu?
- A ti podimus imbiare unu libriteddu pro t’ispricare comente si podet fàghere?
- A cheres chi una pessone de Ràdio Maria ti cramet a domo?
In prus in sa lìtera bi fiat iscritu fintzas chi si podet imbiare dinari a s’indonu pro mèdiu de unu bulletinu biancu chi acumpangiait sa lìtera.
In sos mèdios massivos custa lìtera at fatu iscàndalu mannu: su de imbiare lìteras a sos betzos est chircare a trampare sa gente chi non cunsentit. Chie trampat at a tènnere glòria in sos artos chelos?
E chissai Gesùs ite diat pensare e nàrrere de una cosa gosi…