Paolo Zedda acabat a Pepe Coròngiu o a sa polìtica linguìstica?

Paolo Zedda acabat a Pepe Coròngiu o a sa polìtica linguìstica?

Redatzione

 zeddafotocorrias

Custu est su chi leghimus in su situ internet de su Cussìgiu regionale a pitzu de sa setziada de sa segunda cummissione de su 7 de maju: 

A conclusione della seduta l’assessore, Claudia Firino, ha informato i commissari sulla situazione che riguarda il servizio “lingua sarda”: il dirigente attualmente in servizio è infatti a “comando” ed è in scadenza a partire dal prossimo 16 maggio. Per la conferma è necessaria una norma, da approvare in tempi rapidi in Consiglio regionale. Il consigliere, Paolo Zedda (Soberania e Indipendentzia) si è espresso contro una soluzione in tempi rapidi («serve una valutazione dei risultati della politica linguistica della Regione») e denunciato che «senza l’ingresso della lingua nelle scuole, la lingua sarda non ha un futuro». Il presidente Gavino Manca, nel confermare attenzione e disponibilità a discutere del problema ha dichiarato chiusa la seduta della Seconda commissione. 

De acordu chi non b’at tempus benidore pro sa limba nostra si non nch’intrat in iscola. De su restu tziu Remundu Piras l’aiat iscritu in su sonete nòdidu suo (“O sardu, si ses sardu e si ses bonu…”) cantadu a tenore in cada chirru de Sardigna. Baliat tando, balet galu de prus oe.

Si Pàulu Zedda bolet, podet chistionare cun sos operadores chi ant traballadu in sas iscolas e finas cun unos cantos maistros, pagos, chi impitant su sardu faghende sa letzione de cale si siat matèria. Paga cosa, in generale, ma est in cue chi agatamus sa risposta e s’iscummissa. Si pòmpiet a in cue ca est finas unu logu in ue no ant bìvidu e non bivent sas mìgias de polèmicas postas in campu finas a como. Pitzinnos chi iscoberint su sardu, a comintzare dae su sardu de sa bidda issoro (e dae cale tando?). Custa est una prima valutatzione de sa polìtica linguìstica, ligada a s’iscola bogada-nde a campu dae Zedda. 

Su chi non si cumprendet est pro ite unu chi at sas ideas craras devat nàrrere “serbit una valutatzione”. Ma comente, Paulu, cantadore istimadu, ses dae semper narende chi sa Lsc est unu fallimentu (e calicunu dae tando t’at rispostu), chi issa (e non s’italianu!) podet bortulare s’idioma nostru, chi est fraigada cun paràulas imbentadas e gasi sighende e como ti serbit una valutatzione? Non si valutat ca non b’at bisòngiu (fallimentu declaradu dae tempus) ma a su momentu giustu si narat chi tocat a valutare? 

No, custa no est polìtica linguìstica. Che a sos partidos (totus o belle totus) chi mudant sos dirigentes cun cada mèdiu francu sa dibata polìtica, custa est sa resèssida de s’ùnicu obietivu craru bogadu-nde a campu dae artìculos in internet e grupos in facebook càrrigos de fele. Est a nàrrere a nch’iscùdere a terra su diretore de s’Ufìtziu regionale. 

Su positzionamentu contra a Coròngiu de Zedda at fatu a manera chi in sa cunferèntzia cabu-grupos, su responsàbile de su grupu Rossomori-Partito dei Sardi Emilio Usala s’est opostu a s’urgèntzia de sa lege chi depiat permìtere su rinnovu de Giuseppe Corongiu. Difatis, pro su regulamentu fiat obligatòria s’unanimidade. Su dannu est mannu e como non b’at prus tempus pro agatare mèdiu. Dae chida ch’intrat su servìtziu limba sarda at a abarrare sena ghia e posca b ‘at a andare unu buròcrate cale si siat. Bellu resurtadu.

Foto: Paolo Corrias