Su cussigeri de Rossomori, Emilio Usula, at annuntziadu custu mangianu, in un’addòviu cun sos giornalistas in su Cussìgiu regionale, sa costitutzione de su “Polu de s’Audeterminatzione”, s’agrupamentu nou de s’àrea identitària in ue b’at, in prus de Rossomori, s’assòtziu “Sardos”, sos movimentos “Gentes”, “Comunidades” e “Sardegna possibile”, sos partidos indipendentistas Liberu, Irs e Sardigna Natzione. Sos rapresentantes de sas 8 formatziones polìticas (Paolo Mureddu, Alberto Filippini, Alessandro Mongili, Valentina Sanna, Marta Onnis, Pier Franco Devias, Gavino Sale e Bustianu Cumpostu) ant nominadu prima boghe su giornalista, giai diretore de s’Unione Sarda, Anthony Muroni, cun sa tarea de illustrare obietivos e finalidades de sa formatzione noa chi si decrarat “alternativa a su cuadru polìticu italianu”. “Unu progetu abertu e destinadu a durare in su tempus”, gasi l’at definidu Muroni, chi si 
fundat in sos valores de sa democratzia, de su progressu, de sa solidaridade, de sa crèschida econòmica e ètica, de sa non violèntzia, de s’integratzione e de s’agasàgiu. «Non collaboramus cun sos partidos italianos e non nos amus a alliare cun sas coalitziones de su bipolarismu italianu farsu – at craridu sa prima boghe – ca sos partidos de su tzentrudereta e de su tzentrumanca non cunsìderant s’autodeterminatzione de sos sardos». Sugugiadu fintzas dae sas pregontas de sos giornalistas, Anthony Muroni no at esclùdidu sa partetzipatzione a sas eletziones benientes pro su rennovu de su Parlamentu italianu («su Rosatellum non cumportat s’òbligu de nche colare unu limenàrgiu pro otènnere sos iscannos in sos collègios uninominales») mancari totu fatzat pensare chi su disafiu chi interessat est su pro s’eletzione de su Cussìgiu regionale. Non sunt mancadas sas crìticas a sa Giunta chi b’est como («in contu de cuntierra de sas intradas e de acantonamemntos at mustradu de no èssere a s’ala de sos sardos») e a sa classe polìtica prus in generale («no est istada bona a bardare sos interessos de sos sardos in su raportu cumplicadu intre sa Sardigna e s’Istadu»). «Semus traballende – at cungruidu Muroni – pro permìtere a sos sardos de pòdere seberare s’orizonte istatuale issoro e semus cumbintos 
chi su fenòmenu semper prus mannu de s’astensionismu podat agatare unu frenu in dae in antis de un’oferta polìtica diferente e alternativa a cussa rapresentada dae sos polos italianos in sos ùrtimos 20 annos». Su cussigeri de Rossomori Emilio Usula at a èssere su riferimentu operativu e polìticu, in intro de s’assemblea sarda, de su “Polu pro s’Autoderminatzione”.
Fotografias leadas dae Sardegna 1
Leave a comment