Morgan devet èssere ratza sarda...

 

morganazzu

In internet b’at a runda una noa, chi pertocat unu cantante: si narat Morgan fiat sa boghe de sos “bluvertigo” e est nòdidu meda finas ca fiat unu de sos giùighes de X Factor.

 

Custu probòmine fiat cojuadu cun una pitzinna sarda de 20 annos, e cun issa at àpidu una creadura, e a su chi narat custa giòvana, chi l’at finas cramadu a bancu de reos, custe a sa minuda no la carculaiat e a issa puru nde li cumbinaiat de cada genia.

 

Comente l’ant porrogadu tale Morgan at naradu chi a Sardigna non bi lompet ca si nono in Terranoa l’assennent sos mammuthones, e a custa pitzoca gadduresa isse contu chi li naraiat chi fiat una berbeghe sarda ignorante e gaddinosa.

 

A su mare e a su fogu! In facebook e in internet pristu totu a l’avilire: “ratzista, a ite non ti nc’astringhes a inoghe, ignorante, no ischis su chi ses narende, semper custos arresonos contra a sos sardos”.

 

Totu ispantados.

 

E puru de cussos chi si b’at ispantadu cantos bi nd’at chi non connoschent siat s’istòria chi sa limba e sa cultura sarda? Cantos pensant chi sa limba sarda non serbat a nudda, e ne la faeddant e ne l’imparant.

 

E cando si faeddat de sas berbeghes nemos si rendet contu chi si Benito Urgu andat a sa RAI a cantare semper che a su peus paliatzu de su Regnu “pica su caddu lassa sa berbeghe”, o faghet una cover, mancari curiosa, e li ponet a nùmene “C’è da spostare una pecora”, istorchende sa manera de faeddare nostra finas a la fàghere devènnere una vischidada chi faghet prànghere, su chi faghimus bìdere nois e totu est custu? E bi las ridimus puru, sarvu de nos incorporare cando un’àteru nos s’abbàidat cun sos ogros nostros.

 

Forsis est ora chi nois e totu comintzemus a mudare sa manera de nos bìdere, si cherimus chi finas sos àteros nos bidant in manera diferente.