Chimbanta annos in Casteddu, o mègius, 50 annos sardu. Semper a runda ma sardu, comente narat isse e totu.
Chimbanta annos uvusende in milli ammentos de bida, non petzi de botza, dae unu giovaneddu de 18 annos, a unu mannoi chi li lughent sos ogros cando faeddat de neta sua.
Sa Sardigna sua est cumentzada cando fiat ghirende dae una partita de sa Natzionale Juniores contra a s’Ispagna in su mese de martzu de su 1963, e si l’est acurtziadu s’allenadore suo e l’at naradu: – T’amus bèndidu!- Petzi custu.
Isse fiat pensende a s’iscuadra de su Bologna, ca tando si naraiat de gasi, o a s’Inter, chi isse giughiat in su coro. E imbetze nono, cando l’at domandadu a chie e l’ant torradu: – A su Casteddu- a tzicu no l’at faladu unu bene: fiat tosturrudu e non bi cheriat andare, fiat belle de abarrare arressu un’annu.
Ma, si comente pro tando 37 milliones de francos fiant unu tantu mannu mannu, nche l’ant cumbintu a andare nessi a bìdere comente fiat sa Sardigna e Casteddu.
Comente est arribbadu a Sardigna, a sa prima li pariat de nch’èssere in unu logu ispèrdidu, finas si sos cumpàngios l’ant atzetadu deretu in s’iscuadra: e si comente bi fiat sa possibilidade de colare dae sa Sèrie C a a sa Sèrie B Gigi Riva atzetat de giogare in su Casteddu.
E a pustis de sos primos meses chi b’at coladu pro connòschere mègius su logu, at connotu, e amadu de una bia sa Sardigna.
B’at contos meda ue si podet bìdere cantu Gigi Riva est intradu in su coro de sos sardos, che a su de sa tziedda de Seui chi a costàgiu de sa de su babbu e de sa mama aiat postu sa fotografia de Riva <>, e sena ismentigare sas lìteras de Gratzianu Mesina chi, mancari bandidende addòbiaiat a s’istàdiu a bìdere su Casteddu chi fiat pro èssere Campione de Itàlia.
E Riva s’ammentat finas sas befes e sas paràulas malas chi lis naraiant in totu sos istàdios: berbegàrgios e bandidos, petzi pro èssere sardos.
Finas pro custu isse at seberadu de non mòvere dae Sardigna, de sighire a dare gosu a unu pòpulu chi si connoschiat in cussa iscuadra.
E finas sos fìgios sunt sardos, nàschidos e pàschidos inoghe, Màuru faeddat in sardu puru. Imbetze Nicola est s’ùrtimu chi at àpidu una pitzinnedda, e a issa puru mannoi Gigi una die l’at a contare de cando est lòmpidu a Sardigna, e non b’est mòvidu prus.