Gastu mannu pro sos interventos contra a sos fogos

Foto de Anzelu Canu

“50 milliones de èuros: custu at a èssere su gastu de ocannu in tres meses de interventos contra a sos fogos”. A lu nàrrere  est s’assessore a s’Ambiente de sa Regione Sardigna Andrea Biancareddu chi a pustis de su fogu postu in Arbus martis coladu at denuntziadu totu sos gastos chi sa Regione depet fàghere fronte pro tres meses ebbia de atividade. E in prus at annantu chi “Amus a pagare totu nois ca s’Istadu no nos dat dinari perunu”.

Su contu de s’assessore est craru: s’ant a dèpere pagare 9000 istipèndios pro sos òmines chi ant a chircare de istudare sos fogos (Corpo Forestale, forestales, pompieris, barratzellos), 4 milliones e mesu de èuros pro afitare 12 elicòteros, sos gastos pro sa nafta e sa manutentzione de prus de 400 màchinas a disponimentu de s’Ente Foreste. Sena ismentigare sos gastos mannos pro s’afitu de duos Canadair.

Milliones de èuros duncas bogados a s’impreu de custu dinari contra a sa disocupatzione in s’ìsula, bogados a sa cultura, bogados a su megioru de sas iscolas. Sa neghidadura de sa gente, mancari in pagas dies, est giai manna, a su puntu chi in sa retza sotziale de Facebook b’at chie diat torrare a sos <<Ordinamentos de fogu>> de sa Carta le Logu : “Qui si alcuna persona ponneret fogu istudiosamenti… se seghit silli sa manu destra”.