Sa Die s’at a fàghere. Lu narat Frantziscu Sedda, cun unu post cumpartu oe in su blog ufitziale de su partidu suo. Segundu su segretàriu natzionale de su Partito dei Sardi, sa Giunta Regionale, in una setziada imbeniente at a currègere cun una delìbera sa faddonca chi at burradu dae su bilantzu sa summa giai deliberada dae su Cussìgiu.
S’impignu est de Raffaele Paci, assessore de sa Programmatzione, chi at assiguradu a Augusto Cherchi e Piermario Manca, cussigeris de su partidu de Sedda, chi sa mancàntzia de sos fundos est protzèdida dae una faddonca tècnica sena peruna malesa o sèberu polìticu.
Segundu Sedda, s’assessoradu de sa Cultura at giai aprontadu sa delìbera chi istatuit sas tzelebratziones e assignat sos fundos a istitutziones e iscolas.
“Pro sos cussigeris nostros – at iscritu Sedda – est unu acadessimentu de importu sende chi sos sardos ant deretu de ammentare sas iscutas nòdidas de s’istòria natzionale issoro. E finas a los impreare comente momentos de meledu subra sa balia de sa soberania pròpria. S’impignu est cussu de traballare a tales chi dae s’annu chi benit sas manifestatziones pro Sa Die potzant èssere programmadas cun summas prus mannas e a tempus suo. Comente meresset una festa natzionale”.
Polèmicas e bètias subra sa Die de ocannu non sunt mancadas. In sa proposta de bilantzu de sa Giunta non fiat prevèdida peruna summa pro sas tzelebratziones gasi comente pagu dinare pro sa limba sarda. Sos soberanistas chi apògiant sa Giunta sunt dèpidos intervènnere cun emendamentos in àula pro aderetzare sa figura lègia chi fiant faghende. Posca, sa sorpresa. Cando su bilantzu est arribbadu in assessoradu sos fundos pro Sa Die non bi fiant prus. E tando, est tocadu a fàghere un’interventu nou pro parare fronte acrìticas e atragàgios. De seguru però, pro sos natzionalistas sardos, Sa Die meressiat un’àteru tratamentu.
Abbarrat de bìdere ite manifestatzione ant aprontadu sos de s’assessoradu de sa Cultura. Si s’at a impreare sa limba sarda in sa comunicatzione comente sos annos colados e si s’at a sighire a festare sa die comente gerronada natzionale. Annos a como, sa burocratzia regionale anti-natzionale, proponiat de fàghere editziones “a tema”. Una manera pro illebiare su significu de sa rivolutzione sarda.
Ant at a torrare a fàghere custu giogu? Cussu de pònnere temas chi non b’intrant nudda cun sa rebellia contra a sos istràngios colonialistas?
Leave a comment