Un’àteru apuntamentu pro s’assòtziu polìticu-culturale Sardos. In Casteddu, in su giassu ammaghiadore de Calamosca, in s’albergu chi tenet su matessi nùmene, sàbadu su 4 de santandria, dae sas deghe mancu unu cuartu a sa una, b’at un’addòviu de iscritos e amantiosos, abertu, semper e cando, a totus, cun su tìtulu “Ideas noas de Sardigna acaradas”. Sos temas chi si lis ant a dare prus cara ant a èssere s’urbanìstica, sa sanidade, sos trasportos, sa lege eletorale, ma fintzas sa rapresentàntzia feminile. S’istèrrida la faghet su presidente Alberto Filippini. Sa coordinadora est Simona Coròngiu. B’at relatziones de Giovanni Dore (Continuidade territoriale: su caminu nou de sighire), Paolo Porcella (Sanidade e malàidos: su patu a aguantat?), Laura Cadeddu (Urbanìstica e isvilupu, unu caminu modernu), Elena Secci ( Sas fèminas e sa rapresentàntzia negada). Serrat sos traballos su giornalista Anthony Muroni, cun un’interventu cun su tìtulu “Un’àtera idea de Sardigna”. S’assòtziu Sardos, mancari siat nàschidu dae pagu, est giai ativu meda: s’8 de santugaine at organizadu in Abbasanta un’assemblea regionale chi b’ant leadu parte unas 300 pessones; in cabudanni at ammaniadu in Casteddu su cuntzertu ambientalista Mama Sardigna; e b’at àpidu leadas de positzione pùblicas fintzas in contu de lege urbanìstica e insinnamentu de istòria sarda in iscola.
Leave a comment