CSU in Ollolai: no a Sa Die kafkiana de sa Regione

-de Sarvadore Serra –

Sa parlata de Sarvadore Serra in Ollolai su 30 de abrile 2016 pro sa Die de sa Sardigna cun su CSU –

Sas datas sunt importantes. In sa vida de sas pessones e in sa vida de sas natziones. Sunt estensiones de s’identidade, puntos firmos chi si bi ligat totu su percursu de unu sìngulu o de unu pòpulu. E gasi, pro sa natzione italiana, est importante su 25 de abrile, pro ammentare de cando nch’ant dispatzadu sos nazifascistas; est importante su 2 de làmpadas, pro ammentare de cando sunt colados dae sa monarchia a sa repùblica; est importante su 4 de santandria, pro ammentare cando ant postu remèdiu a su disacatu de Caporetto e ant bintu sa prima gherra mundiale.

Sa natzione sarda pro sèculos no at tentu una festa natzionale. E no est de badas. Dae cando sos sardos ant pèrdidu sa gherra cun sos invasores, s’istòria l’ant iscrita sos binchidores, chi ant negadu, in s’organizatzione de s’istrutzione pùblica, cada protagonismu de sos chi ant pèrdidu. E pro sèculos s’est isvilupadu su filu ruju (o nieddu) de unu negatzionismu chi at cuadu totu sos eventos prus de importu de s’istòria sarda: dae sa tzivilidade nuràgica a sos giuigados, dae sa rebellia antimonàrchica de su seschentos a sa rivolutzione antifeudale de su setighentos, dae s’errore istòricu de sa fusione perfeta in s’otighentos a sa nàschida de su movimentu sardista in su noighentos. In dies de oe no est cambiadu nudda: sos programas iscolàsticos ministeriales sighint a negare a s’iscarada s’esistèntzia de un’istòria sarda.

In custa situazione kafkiana, 23 annos a como s’est creadu un’elementu de contraditzione. Su 14 de santugaini 1993 su Cussìgiu regionale de Sardigna at istituidu “Sa Die de sa Sardigna” pro ammentare su 28 de abrile de su 1794, cando sos sardos, istracos de un’opressione coloniale chi non podiant prus aguantare, nch’ant dispatzadu dae Sardigna su vitzerè e totu sos funtzionàrios piemontesos, prus de 500 pessones. Un’eventu chi est istadu su cumintzu de su triènniu rivolutzionàriu sardu.

Duncas sa natzione sarda, in fines, at tentu sa festa natzionale sua. Est pagu? Est meda? De seguru est pagu, ca sos programas ministeriales italianos sighint a negare s’istòria sarda. E belle gasi, calicunu diat chèrrere neutralizare fintzas custu pagu. E lu faghet dedichende sa Die de sa Sardigna a temas chi non b’intrant unu bellu nudda. Ocannu, pro nàrrere, ant bogadu su tema de sos migrantes. Un’àteru annu diant pòdere bogare a campu su tema de su riscaldamentu globale de sa terra o de su bullismu in sas iscolas. Totu argumentos interessantes, est craru, ma chi non b’intrant nudda cun su triènniu rivolutzionàriu sardu.

Pro bonaura, b’at tzitadinos chi la cherent festare a beru, sa Die de sa Sardigna, e ant amaniadu eventos in totue pro ammentare su significadu suo. Comente custu de Ollolai, in ue sos bidende gente meda interessada, A si nd’ant a abbigiare sos chi, in custu mamentu, sunt guvernende sa Regione sarda? Deo pesso pròpiu chi eja.