Limba Sarda 2.0 at a trasmìtere sa manifestatzione de cras 13 Nadale contra a sas tzerachias militares in streaming. A pustis de sa renèssida manna de sa direta streaming de sa ‘Manifestatzione Natzionale contra a s’ocupatzione militare’ de su 13 Cabudanni in Cabu Frasca (chi at regortu deghina de mìgia de visualizatziones) castia.me, cun s’agiudu de su consòrtziu Eja Tv, torrant a propònnere s’eventu.
Sa direta at a èssere possìbile a dda bìdere finas inoghe in Limba Sarda 2.0 in modalità de AllWeb® inghitzende a oras de sas 12.00.
In prus de sos interventos de trasmìtere dae su palcu, b’at àere un’ispàtziu pro intervistas e cummentos a sos manifestantes.
Limba Sarda 2.0 aderit a sa manifestatzione e gasi su Coordinamentu pro su Sardu Ufitziale gasi comente fiat capitadu in Cabu Frasca. Oràriu e logu sunt a sas 10 in su Molu Ichnusa.
Torramus a publicare su comunicadu de cunvocatzione.
Su 4 de ladàmine in Santa Giusta b’at àpidu un’ Assemblea manna chi at faeddadu de sa mègius manera pro sighire sa pelea contra a s’ocupatzione militare de sa Sardigna, a pustis de sa Manifestada Natzionale de Capo Frasca de su 13 de cabudanni.
Ant faeddadu sos rapresentantes de deghinas de movimentos, assòtzios e comitados e sìngulos tzitadinos medas. Totus fiant de acordu chi depimus ispartzinare sa pelea in sos territòrios e fàghere in Casteddu un’àteru passàgiu de importu de sa pelea populare contra a sas servitù, giughende a in antis sas tres rivendicatziones de sa Manifestada Natzionale de Capo Frasca:
firmare deretu totu sas esercitatziones militares
serrare totu sas bases e sos polìgonos militares
sa bonìfica e sa ricunversione produtiva de is logos
Su chi s’est addobiadu in Capo Frasca e in Santa Giusta est su movimentu populare sardu, mannu e diferentziadu, chi s’agatat unidu dae sa netzessidade de agabbare deretu s’ocupatzione militare italiana.
Totu sas ànimas suas (indipendentistas, ambientalistas, patzifistas, antimilitaristas, etc) sunt importantes pro liberare s’ìsula nostra dae sa tzerachia militare.
S’Assemblea in majoria fiat de acordu pro invitare totu is movimentos, assòtzios, comitados, coordinamentos e tzitadinos chi gherrant in Sardigna contra a s’ocupatzione militare a organizare paritzas initziativas (sit-in, volantinàgios, addòbios, dossier, manifestatziones culturales, etc) pro ismanniare su protagonismu de sa gente e fàghere crèschere sa fortza populare pro sa manifestada natzionale de su mese de nadale.
S’Assemblea est agabbada a pustis de paritzas oras e deghinas de interventos, essende in majoria de acordu pro seberare comente die possìbile pro sa manifestada sàbadu su 13 de nadale, faghende-la in una die prefestiva pro dare a su nùmeru prus mannu de persones sa possibilidade de partetzipare:
Sa Segunda Manifestada Natzionale contra a s’Ocupatzione Militare at a èssere sàbadu su 13 de nadale in Casteddu.
Amus a traballare pro fàghere in modu chi siat una dimostratzione manna de sa fortza de su pòpulu sardu e de sa capatzidade sua de si mobilitare pro difèndere sa dignidade sua e su deretu a esìstere e a detzìdere in manera soberana in sa terra sua.
Leave a comment
..b’amos a esser…