Colli: e como sa Costituente pro s'istatutu nou

Casteddu – Su segretàriu de sos Bator Moros Giovanni Colli at decraradu ca «su primu datu polìticu rilevante de su resurtadu referendàriu est de seguru sa craresa de sa volontade populare chi s’est espressada in manera direta e sena intermediatziones». Colli at cummentadu in custu modu su resurtadu de sos referendum e at agiuntu: «Espressamus soddisfatzione manna a distintu pro s’èsitu positivu chi fiat giai in sas isperàntzias de sos sardistas a su cuesitu chi pediat sa riscritura de s’Istatutu sardu dae parte de un’Assemblea Costituente elèghida a sufràgiu universale».

Pro custu su segretàriu de su Partidu Sardu apretat su Cussìgiu regionale a aprovare deretu sa lege istitutiva de s’Assemblea Costituente. In custu modu, sighit Colli, s’at a arribbare a ispàtzios prus mannos de soberania chi sunt su fundamentu de cale si siat càmbiu e progressu de sa Natzione Sarda.

«So seguru ca su presidente Cappellacci chi tantu s’est impignadu pro connòschere su pàrrere de sos sardos at a pònnere mente cun ateretanta lestresa a s’inditu retzidu, onorende in custu modu un’impignu programmàticu craru leadu in s’acordu eletorale cun sos sardistas in su mese de freàrgiu de su 2009, oramai a tesu» at concruidu.