Casteddu, ora de s'ischidare.

cASTEDDU

Sa classìfica ghetat pore e su calendàriu non permitet àteras faddinas. Pro su Casteddu sa de domìniga chi benit in su Dall’Ara de Bologna at a èssere una partida fundamentale pro su campionadu. In su girone de andada sos emilianos ant trobeidu su casteddu renessende a si nche balangiare tres puntos chi balent meda, mescamente in s’ànimu de sos giogadores. Tres retes e a ghirare. Sa partida pèrdida cun su Lazio diat pòdere àere lassadu murrùngiu in s’iscuadra, si non pro àteru pro totu su chi est cumbinende a in tundu de s’ispolliatoju. Murru si nche torrat a sètzere in tribuna, Cossu est gioghende pagu e nudda, e Sau non paret mancu su matessi giogadore chi annu passadu at ammajadu mesu Sèrie A, e finas sos chi sunt afilende cada domìniga giogant in unu ruolu diferente. Tocat a mudare carchi cosa pro no arriscare sa Sèrie B.