Ant iscobertu unu neurone nou in su cherbeddu umanu.

– de Sarvadore Serra –

Sa famìlia de sas tzèllulas tzerebrales nostras tenet, dae como, un’elementu nou e misteriosu. Est una casta de neurone chi finas a oe non si connoschiat, prenu de connessiones, chi sos istudiosos chi l’ant imbènnidu l’ant postu a nùmene “rosa mosqueta”.

Custa classe noa de neurones l’ant agatada in su pìgiu de subra de sa còrtiga tzerebrale, in ue castas medas  de neurones traballant  pro inibire s’atzione de àteros neurones. Cosa curiosa, custa tzèllula tzerebrale noa no est presente in su cherbeddu de àteros animales, comente sos sòrighes.

Sos istudiosos de s’Istitutu Allen pro sas Sièntzias Tzerebrales, in Seattle, e de su Grupu de Istùdiu de Microtzircùitos Corticales de su Dipartimentu de Anatomia, Fisiologia e Neurosièntzias de s’Universidade de Szsged, in Ungheria, ant imbènnidu sos neurones in fògios de tessìngiu tzerebrale umanu cando fiant faghende unu traballu pro classificare sas tzèllulas de su cherbeddu nostru.

A su chi b’at iscritu in un‘artìculu publicadu in Nature Neuroscience, sas tzèllulas noas sunt “minores e cumpatas, cun una forma densa e ispissa”. Sos istudiosos ant pensadu a su nùmene de “rosa mosqueta” cando si sunt abbigiados  chi in unos cantos puntos oros oros  de sas projetziones issoro, pròpiu in ue trasmitint  singiales  a àteras  tzèllulas (pulsantes assònicos), custos neurones teniant unas cantas istruturas bulbosas mannas a beru.

Pro classificare custos neurones noos sos istudiosos ant analizadu s’espressione genètica issoro. E est istadu tando  chi si sunt serados  chi su cumplessu  de sos genes issoro non currispondiat cun peruna tzèllula  connota de su sòrighe, chi su cherbeddu suo l’impitant a s’ispissu comente modellu pro sos umanos.

Non s’ischit cale est sa funtzione  de custos neurones. Pro como, petzi si podet nàrrere chi formant su 10 – 15% ebbia de sos neurones inibidores de su primu pìgiu de sa còrtiga tzerebrale. E si pensat chi siant galu prus pagos in àteras partes de su cherbeddu. De seguru, s’assentu de sos puntos de cuntatu issoro cun sos àteros neurones faghet pensare chi s’agatant  in una positzione privilegiada e “poderosa” pro frenare s’intrada de àteros singiales “pagu disigiados” chi ativant in manera esagerada sos tzircùitos neuronales cumplessos de su cherbeddu.

In custu mamentu sos istudiosos sunt chirchende de intzertare comente s’organizant e s’ìntegrant custos neurones noos in sos tzircùitos prus mannos. E si sa disfuntzione o s’eliminatzione issoro contribuit in carchi manera a sa nàschida  de disturbos neuropsichiàtricos.

Ligàmenes:

https://www.abc.es/ciencia/abci-hallan-nuevo-tipo-neurona-cerebro-humano-201808290841_noticia.html

https://www.nature.com/articles/s41593-018-0205-2

https://tg24.sky.it/scienze/ricerca/2018/08/28/neurone-assomiglia-rosa-senza-petali.html

 

Lassa unu cummentu

S'indiritzu email tuo no at a èssere publicadu. Is campos pedidos sunt signados *

*

shared on wplocker.com