Proxima b, su pianeta pedrosu a curtzu nostru

-de Sarvadore Serra –

4-2001-odissea-nello-spazio

In mesu de totu sos esopianetas chi ant iscobertu, bi nd’at unu chi cheret mentovadu. E non solu ca sa massa sua  s’acùrtziat  meda a sa de sa Terra (1,3 bortas sa de su pianeta nostru, pro èssere pretzisos), o, ca, pro sa temperadura sua, est probàbile chi b’apat abba in sa superfìtzie. Sa novidade manna est chi est meda ma meda  a curtzu a nois: Proxima b, custu est su nùmene de custu pianeta pedrosu, òrbitat a fùrriu de Proxima Centauri, s’isteddu prus a curtzu a su Sole nostru, a unos 4 annos lughe dae su Sistema solare. Nde faeddat, in sas pàginas de “Nature”, s’astrònomu  Guillem Anglada Escudè, chi in pare cun sos collegas suos at istudiadu sos datos collidos intre su 2000 e su 2014 dae duos telescòpios  de su European Southern Observatory (Osservatòriu Europeu Meridionale) e àteras osservatziones  de su perìodu ghennàrgiu – martzu 2016.

Sos istudiosos, in particulare, ant analizadu sas chi si narant “mesuras Doppler”, chi sunt de profetu pro carculare sos istesiamentos minores  de un’isteddu incausados dae sa fortza gravitatzionale  de pianetas eventuales  chi òrbitant a fùrriu suo.

Dae custas osservatziones resurtat chi a curtzu a Proxima Centauri  paret chi b’apat unu pianeta caente cun sa massa chi s’assimìgiat  a sa de sa Terra, chi su perìodu orbitale suo diat èssere de pagu prus  de 11 dies. Su pianeta, pro èssere pretzisos, diat èssere a unos 7,5 miliones de chilòmetros dae s’isteddu – pro fàghere unu cunfrontu, devimus ammentare chi sa Terra  nch’est a unos 150 milliones  de chilòmetros dae su Sole. Su perìodu orbitale faghet a manera chi Proxima b s’agatet in sa chi li narant  “zona temperada” e duncas, nessi in teoria, bi diat dèvere àere abba in sa superfìtzie.

Sa veridade est chi nd’ischimus galu tropu pagu: s’abitabilidade potentziale de custu pianeta pedrosu  est una cosa chi galu nde sunt arresonende, e b’at a chèrrere àteras  osservatziones  de s’atmosfera  pro dare una risposta prus segura. In prus, sigomente  su pianeta est a curtzu meda a su sole suo, est probàbile chi lompant flussos de rajos X meda prus fortes  de sos chi arribbant a sa Terra dae su Sole. Pro como non s’ischit si Proxima b tenet unu campu magnèticu  chi siat a tretu  de l’ischermare  dae cussas radiatziones, comente acuntesset pro su pianeta nostru.

6-ufo“In sos sèculos venidores, de seguru su gènere umanu  diat pòdere proare  a esplorare  su pianeta cun sos robot”, iscriet  Artie Hazas in sa matessi rivista. “Proxima Centauri  at a durare meda  de prus de su sole nostru. Dunncas formas eventuales de vida in su pianeta [o sa nostra, si in casu nos detzidimus  de nos nche tramudare a cue, ndr], si diant pòdere evòlvere pro tempus meda fintzas a pustis chi su Sole si nch’est istudadu”.

Ligàmene: http://www.wired.it/scienza/spazio/2016/08/25/pianeta-simile-terra-stella-vicina-sole/?utm_source=facebook&utm_medium=cpc&utm_campaign=Scienza_pianeta-simile-terra_DKTP

 

Lassa unu cummentu

S'indiritzu email tuo no at a èssere publicadu. Is campos pedidos sunt signados *

*